នៅថ្ងៃទី០៧ ខែកក្កដា ឆ្នាំ២០០៨ នាសម័យប្រជុំលើកទី៣២ របស់ខ្លួនដែលប្រព្រឹត្តទៅ នៅទីក្រុងកេបិក ប្រទេសកាណាដា គណៈកម្មាធិការបេតិកភណ្ឌពិភពលោកនៃអង្គការដើម្បីវប្បធម៌ វិទ្យាសាស្រ្ត និងអប់រំរបស់អង្គការសហប្រជាជាតិបានសម្រេចចុះប្រាសាទព្រះវិហាររបស់ខ្មែរក្នុង “បេតិកភណ្ឌពិភពលោក” តាមសំណើររបស់រាជរដ្ឋាភិបាល នៃព្រះរាជាណាចក្រកម្ពុជា។
ការចុះបញ្ជីនេះនឹងតម្រូវឱ្យសហគមន៍អន្តរជាតិទាំងមូលមានកាតព្វកិច្ចសហប្រតិបត្តិការ
ការពារនូវបេតិកភណ្ឌសាកលនេះ និងថែរក្សាជាសម្បត្តិវប្បធម៌កេរមរតកសម្រាប់មនុស្សជំនាន់ក្រោយ។ នេះជាបេតិកភណ្ឌខ្មែរទី៤
ហើយដែលត្រូវបានទទួលលក្ខន្តិកៈដ៏ខ្ពង់ខ្ពស់ ថ្លៃថ្នូរ
បន្ទាប់ពីប្រាសាទអង្គរវត្តត្រូវបានបញ្ចូលក្នុងបញ្ជីបេតិកភណ្ឌពិភពលោក។
ដូចគ្នាដែរនៅឆ្នាំ១៩៩២ របាំក្បាច់បុរាណខ្មែរ(របាំព្រះរាជទ្រព្យ) និងល្ខោនស្បែកធំ
ត្រូវបានបញ្ចូលជា បេតិកភណ្ឌវប្បធម៌អរូបី នៃមនុស្សជាតិនៅឆ្នាំ២០០៣ និងនៅឆ្នាំ២០០៥ កន្លងមក។
ប្រជាជនកម្ពុជាទាំងមូល
ពិតជាកោតស្ញប់ស្ញែងនូវព្រះរាជបញ្ញាញាណ និងសូមថ្លែងអំណរព្រះគុណដ៏ជ្រាលជ្រៅ
និងស្មោះស័្មគ្របំផុតថ្វាយសម្តេចព្រះមហាវីរៈក្សត្រ ព្រះបាទសម្តេចព្រះនរោត្តមសីហនុ ដែលបានប្រទាននូវព្រះរាជកិច្ចដឹកនាំដ៏ខ្ពង់ខ្ពស់បំផុតប្រកបដោយស្មារតីស្នេហាជាតិដ៏ជ្រាលជ្រៅក្នុងការតស៊ូទាមទារវិញ
និងការពារបាននូវអធិតេយ្យភាព
បូរណភាពទឹកដីស្របច្បាប់របស់ព្រះរាជាណាចក្រកម្ពុជាលើប្រាង្គប្រាសាទព្រះវិហារដែលជាស្ថាបត្យកម្មខ្មែរដ៏អស្ចារ្យ។
