ព្រះនាងឥន្រ្ទទេវី ទ្រង់ប្រសូតនៅក្នុងត្រកូលក្សត្រ។ ព្រះនាងមានព្រះកនិដ្ឋាមួយព្រះអង្គគត់ គឺព្រះនាងជ័យទេវី។ ក្នុងវិស័យសិក្សា ព្រះនាងទ្រង់យកព្រះទ័យទុកដាក់ក្នុងការហាត់រៀនភាសាសំស្រ្កឹត មុខវិជ្ជាអក្សរសាស្រ្ត និងវិទ្យាសាស្រ្តផ្សេងៗទៀតយ៉ាងស្ទាត់ជំនាញ ជាពិសេសទស្សនវិជ្ជាព្រះពុទ្ធសាសនា។ ព្រះនាងត្រូវបាន ព្រះបាទជ័យវរ្ម័នទី៧សព្វព្រះរាជហឫទ័យ ហើយរៀបអភិសេកជា អគ្គមហេសីរបស់ព្រះអង្គ។
ក្រោយពេលដែលបានជួបព្រះរាជស្វាមីវិញ ព្រះនាង ឥន្ទ្រទេវី បានយាងធ្វើបុណ្យគ្រប់ទិសទី។ ព្រះនាងមានព្រះរាជបញ្ជាឱ្យលេងរបាំ និងសម្តែងរឿងដែលស្រង់ចេញពីទសជាតក។ ព្រះនាងដាក់ទ្រព្យសម្បត្តិរបស់ព្រះនាង ឱ្យជាប្រយោជន៍ដល់សាសនានិងមនុស្សក្រីក្រ។ ព្រះនាងបានប្រមូលក្មេងស្រីដែលម្តាយបោះបង់ និងបង្កើតជាភូមិឱ្យរស់នៅ ជាភូមិមានសេចក្តីសុខចម្រើន។ ព្រះនាងទ្រង់ឱ្យក្មេងស្រីទាំងនោះបួសនិងប្រតិបត្តិធម៌ខ្ជាប់ខ្ជួន។ ព្រះនាង ឥន្ទ្រទេវី បានថ្វាយសម្ភារជាច្រើនដល់ប្រាសាទនានា ដូចជា ប្រាសាទស្រីរាជចូឌាមណី (ប្រាសាទព្រះខាន់) ស្រីជ័យស្រី (ប្រាសាទតាព្រហ្ម) ប្រាសាទ មធ្យាទ្រិ (ប្រាសាទភ្នំបាខែង) ស្រីជយក្សេត្រសិវៈ (ប្រាសាទបាសែត/បាណន់ ខេត្តបាត់ដំបង) សិវបុរៈ (តាមលោក សឺដែស ប្រាសាទនេះអាចជាប្រាសាទ ភ្នំសន្ទុក ឬ ភ្នំបាយ៉ង់) ប្រាសាទ វិមាយ (ភិមាយ បច្ចុប្បន្ន នៅប្រទេសថៃ) ប្រាសាទប្រឹវទ្រី (ភ្នំរុងបច្ចុប្បន្ននៅប្រទេសថៃ)។ ក្រៅពីការធ្វើកុសលកម្មនានា ចំពោះសាសនា ព្រះអគ្គមហេសីអង្គនេះ បានឱ្យគេស្ថាបនាបដិមាជារូបតំណាង ព្រះមាតា ព្រះបិតា ព្រះអនុជ មិត្តភក្តិ សាច់សាលោហិតដែលព្រះនាងស្គាល់ ឬអ្នកដែលធ្លាប់បាននិយាយប្រាស្រ័យទាក់ទងនឹងព្រះនាង ជាពិសេស ព្រះនាងបានឱ្យគេសាងបដិមា ព្រះនាង ជ័យរាជទេវី ព្រះបាទជ័យវរ្ម័នទី៧ និង បដិមាតំណាងរូបព្រះនាង តម្កល់នៅគ្រប់ភូមិ។
ព្រះនាង ឥន្ទ្រទេវី មានសម្រស់បីដូចទេពធីតាដែលបញ្ចេញរស្មី។ ក្នុងផ្នែកចំណេះដឹង ព្រះនាងមានចំណេះខ្ពង់ខ្ពស់លើសទស្សនវិទូនានា។ ព្រះនាងមានប្រាជ្ញាឈ្លាសវៃពីធម្មជាតិ។ នៅអាស្រមព្រះពុទ្ធសាសនា ព្រះនាងជាប្រធាននៃសាស្ត្រាចារ្យទាំងឡាយដោយព្រះនាងបង្រៀនជារៀងរាល់ថ្ងៃដល់ស្ត្រីនានា នៅក្នុងអាស្រម។ ជាស្ត្រីខ្មែរមួយរូប មានមោទនៈ ចំពោះភាពរុងរឿងនៃប្រទេសកម្ពុជាសម័យអង្គរហើយសរសើរប្រទេសកម្ពុជាថា "ស្មើមេឃ" ជាស្ត្រីខ្មែរមួយរូបដែលបានតែងកំណាព្យសរសើរជាភាសាសំស្ក្រឹតដ៏ល្អឥតខ្ចោះ ព្រះនាង ឥន្ទ្រទេវី បញ្ជាក់ថា ព្រះនាងមានស្វាមីភ័ក្តិចំពោះ ព្រះបាទ ជ័យវរ្ម័នទី៧ រៀងរហូតដល់ព្រះនិព្វាន។
