ចរន្ដខ្យល់បក់កើតឡើងដោយសារការប្រែប្រួលនៃ សម្ពាធខ្យល់។ សម្ពាធខ្យល់ប្រែប្រួលជាទូទៅគឺបណ្ដាលមកពីកម្ដៅមិនស្មើគ្នានៅលើផែនដី។ ខ្យល់បក់បណ្ដាលមកពីការប្រែប្រួលសម្ពាធខ្យល់នៅតំបន់អេក្វាទ័រ និងនៅតំបន់ប៉ូល។ ជាទូទៅខ្យល់បក់ពីតំបន់ប៉ូល(សម្ពាធខ្លាំង) ទៅតំបន់អេក្វាទ័រ (សម្ពាធខ្សោយ) ។
រូបភាព៖ ចលនាខ្យល់
ខ្យល់បក់ប្រចាំទី ជាខ្យល់ដែលបក់ក្នុងរយៈចម្ងាយខ្លី វាកើតឡើងដោសារកម្ដៅមិនស្មើគ្នានៃផ្ទៃផែនដី ក្នុងតំបន់តូចមួយ។ ខ្យល់បក់ប្រចាំទីមាន 2 គឺ ខ្យល់ជំនោរសមុទ្រ និង ខ្យល់ជំនោរទ្វីប។
ខ្យល់ជំនោរសមុទ្រ គឺខ្យល់ដែលបក់ចេញពីសមុទ្រទៅរកទ្វីប វាកើតឡើងនៅពេលថ្ងៃ។
ខ្យល់ជំនោរទ្វីប គឺ ខ្យល់ដែលបក់ចេញពីទ្វីបទៅរកសមុទ្រ វាកើតឡើងនៅពេលយប់។
ខ្យល់មូសុង ជាខ្យល់បក់មួយប្រភេទដែលផ្លាស់ប្ដូរទិសតាមរដូវ។ ប្រព័ន្ធខ្យល់បក់មូសុងស្ថិតនៅចន្លោះមហាសមុទ្រឥណ្ឌា និងទ្វីបអឺរ៉ាស៊ី គ្របដណ្ដប់អាស៊ីខាងត្បូងរហូតដល់អាស៊ីខាងកើត រួមទាំងអាស៊ីអាគ្នេយ៍ផងដែរ។ ខ្យល់នេះបង្កើតឲ្យមានរដូវ 2 គឺ រដូវប្រាំង និងរដូវវស្សា ហើយវាមានលក្ខណៈស្រដៀងគ្នានឹងខ្យល់ជំនោរសមុទ្រ និងខ្យល់ជំនោរទ្វីប កើតឡើងជាប្រចាំថ្ងៃនៅក្នុងតំបន់តូចៗ ។
រូបភាព៖ ខ្យល់ជំនោរសមុទ្រ និងជំនោរទ្វីប
