(ជ៣) មេរៀនទី១៖ (សង្ខេបមេរៀន) រដូវនៅប្រទេសកម្ពុជា

១. រដូវប្រាំង

      រដូវប្រាំងមានរយៈពេល 6 ខែ ចាប់ពីខែវិច្ឆិកា ដល់ខែមេសា ខ្យល់បក់ពីទិសឦសានទៅនិរតី (ពីសម្ពាធខ្លាំងស៊ីបេរី ឆ្ពោះទៅសម្ពាធខ្សោយនៅមហាសមុទ្រឥណ្ឌា)  មានភ្លៀងកក់ខែខ្លះៗ នៅខែមករា និងខែធ្នូ។
      គេចែករដូវប្រាំងជា 2 គឺ
     ◾  រដូវរងា ( រដូវរំហើយ ) មានរយៈពេល 3 ខែ ពី ខែវិច្ឆិកា ដល់ខែមករា។
     ◾  រដូវក្ដៅ មានរយៈពេល 3 ខែ ពី ខែកុម្ភៈ ដល់ខែមេសា។

២. រដូវវស្សា

      រដូវវស្សាមានរយៈពេល 6 ខែ ចាប់ពីខែឧសភា ដល់ខែតុលា ខ្យល់បក់ពីទិសនិរតីទៅទិសឦសាន (ពីសម្ពាធខ្លាំងមហាសមុទ្រឥណ្ឌា ឆ្ពោះទៅសម្ពាធខ្សោយស៊ីបេរី)  បាននាំទាំងទឹកភ្លៀងទៅគ្រប់ទីកន្លែង និងមានកូនរដូវប្រាំងរយៈពេល 15 ថ្ងៃ ចាប់ពីចុងខែកក្កដារហូតដល់ដើមខែសីហា។

ប្រភព:  https://samnangrin.blogspot.com/2016

៣. ផលប៉ះពាល់នៃរដូវទាំងពីរ

     ◾  រដូវប្រាំង អាកាសធាតុក្ដៅខ្លាំងបង្កឲ្យមានអគ្គិភ័យ ខ្វះខាតទឹក សីតុណ្ហភាពខ្ពស់ និងបង្កជំងឺច្រើន  ។
     ◾  រដូវវស្សា របាយទឹកភ្លៀងមិនស្មើគ្នាបង្កឲ្យមានទឹកជំនន់ និងគ្រោះរាំងស្ងួត ហើយមានកូនរដូវប្រាំង។

៤. កម្ពស់ទឹកភ្លៀង និងសីតុណ្ណភាព

៤.១. កម្ពស់ទឹកភ្លៀង

      កម្ពស់ទឹកភ្លៀងប្រចាំឆ្នាំលើសពី 1ម៉ែត្រ ទឹកភ្លៀងចាប់ផ្ដើមធ្លាក់នៅពាក់កណ្ដាលខែឧសភា រហូតដល់ខែតុលា វាមានទំនាក់ទំនងយ៉ាងជិតស្និទ្ធនឹងរបបខ្យល់មូសុង ។

៤.២. សីតុណ្ហភាព

     ◾  សីតុណ្ហភាពមធ្យមប្រចាំឆ្នាំ 27⁰C ។
     ◾  សីតុណ្ហភាពខ្ពស់បំផុតនៅខែមេសា 40⁰C ។
     ◾  សីតុណ្ហភាពទាបបំផុតនៅខែមករា 14⁰C ។

៥. ការងារប្រតិបត្តិ

៥.១. របៀបរកសីតុណ្ហភាពមធ្យម

      យើងអាចដឹងសីតុណ្ហភាពបានដោយសីតុណ្ហមាត្របារត (ទែម៉ូម៉ែត្រ) ដើម្បីវាស់សីតុណ្ហភាព។
     ◾  សីតុណ្ហភាពប្រចាំថ្ងៃ៖ ជាមធ្យមនព្វន្ដនៃសីតុណ្ហភាពដែលគេស្រង់យកនៅក្នុងម៉ោងខុសៗគ្នាក្នុងមួយថ្ងៃ
     ◾  សីតុណ្ហភាពប្រចាំខែ៖ ជាមធ្យមនព្វន្ដនៃសីតុណ្ហភាពមធ្យមប្រចាំថ្ងៃក្នុងខែនីមួយៗ ។
     ◾  សីតុណ្ហភាពប្រចាំឆ្នាំ៖ ជាមធ្យមនព្វន្ដនៃសីតុណ្ហភាពមធ្យមប្រចាំខែទាំង 12 ក្នុងឆ្នាំនីមួយៗ ។

៥.២. របៀបវាស់កម្ពស់ទឹកភ្លៀង

      គេវាស់ទឹកភ្លៀងបានដោយប្រើឧបករណ៍ម្យ៉ាងហៅថា ភ្លៀងម៉ែត្រ។ គេត្រង់យកទឹកភ្លៀងជារៀងរាល់ថ្ងៃ ដោយរក្សាទុកកុំឲ្យមានរំហួត ឬ ជ្រាបចេញបាន នោះគេបានកម្ពស់ទឹកភ្លៀងប្រចាំខែ ឬ ឆ្នាំ ដោយបូកកម្ពស់ទឹកភ្លៀងប្រចាំថ្ងៃ ឬខែ ក្នុងខែ ឬឆ្នាំណាមួយ។