(ជ៤) មេរៀនទី២៖ (សង្ខេបមេរៀន) ភពនិងតារា

១. ភព

          ក្នុងប្រព័ន្ធព្រះអាទិត្យមានភពទាំងអស់ចំនួន ៨ ភព។ ក្នុងនោះមានភព 5 ដែលយើងអាចមើលឃើញដោយភ្នែកទទេគឺ ភពពុធ ភពសុក្រ ភពអង្គារ ភពព្រហស្បតិ៍ និងភពសៅរ៍។

១.១. ភពពុធ

          ភពពុធ យើងមើលឃើញក្រោយថ្ងៃលិច ឬមុនថ្ងៃរះ មួយឆ្នាំមានរយៈពេល 88 ថ្ងៃនៃផែនដី សីតុណ្ហភាព ពេលថ្ងៃ 427 ^oC ពេលយប់ -170 ^oC ។

១.២. ភពសុក្រ

           ភពសុក្រ បរិយាកាសមានឧស្ម័នកាបូនិច យើងមើលឃើញក្រោយថ្ងៃលិច ឬមុនថ្ងៃរះ មួយឆ្នាំមានរយៈពេល 225 ថ្ងៃនៃផែនដី សីតុណ្ហភាពពេលថ្ងៃ  480 ^oC ពេលយប់ -13 ^oC ។

១.៣. ភពអង្គារ

           ភពអង្គារ ចាំងពន្លឺព្រឹមៗមកផែនដី។ ភពអង្គារ មានពណ៌ក្រហម (កើតពីច្រេះដែក)  និងកាតិបទឹកកក (កើតពីឧស្ម័នកាបូនិច) មួយឆ្នាំមានរយៈពេល 1 ឆ្នាំ  8  ខែ 8 ថ្ងៃនៃផែនដី សីតុណ្ហភាពត្រជាក់ -130 ^oC ។

១.៤. ភពព្រហស្បតិ៍

          ភពព្រហស្បតិ៍ បរិយាកាសមានអ៊ីដ្រូសែនជាភពធំជាងគេ ភ្លឺចាំងចែងនៅលើមេឃពេលយប់ មួយឆ្នាំមានរយៈ ពេល 11 ឆ្នាំ  8 ខែ នៃផែនដី។

១.៥. ភពសៅរ៍

         ភពសៅរ៍ បរិយាកាសមានអ៊ីដ្រូសែនមានរង្វង់ព័ទ្ធជុំវិញ 7 ជាទឹកកក។ មួយឆ្នាំមានរយៈពេល 29  ឆ្នាំ 4 ខែ 6 ថ្ងៃនៃផែនដី។

២. លក្ខណៈតារា

        តារាស្ទើរតែទាំងអស់មានសមាសភាពគីមីដូចគ្នា អ៊ីដ្រូសែន អេល្យ៉ូម និងរូបធាតុដទៃទៀតដូចជា អុកស៊ីសែន  នេអុង ធ្យូងថ្ម និងនីត្រូសែន។ តារាក្ដៅបំផុត មានសីតុណ្ហភាព 50 000 ^oC បញ្ចេញពន្លឺពណ៌ ខៀវស  ហើយតារាត្រជាក់បំផុតមានសីតុណ្ហភាព 3 000 ^oC បញ្ចេញពន្លឺក្រហម។

៣. តារានិករនិងរដូវ

        ចលនាផែនដី និងព្រះអាទិត្យនៅលើមេឃមានឥទ្ធិពលលើតារា និងតារានិករដែលយើងមើលឃើញ តារានិករ ខ្លះមិនរះ មិនលិច និងតារានិករភាគច្រើន យើងអាចមើលឃើញវានៅតាមរដូវនៅលើផែនដី។