(ជ៣) មេរៀនទី១៖ (មេរៀនសង្ខេប) ប្រទេសកូរ៉េខាងត្បូង

និយមន័យ

◾ ឧទ្យានជាតិ៖ តំបន់ធម្មជាតិបង្កើតដោយច្បាប់មានទេសភាពធម្មជាតិ ប្រើសម្រាប់អភិរក្សធម្មជាតិ ស្រាវជ្រាវ
ការអប់រំ កំសាន្ត។
◾ ម៉ាក្រូសេដ្ឋកិច្ច៖ ជាផ្នែកមួយនៃវិទ្យាសាស្រ្តសេដ្ឋកិច្ចដែលពន្យល់ពីទំនាក់ទំនងរវាងធាតុនានានៃសេដ្ឋកិច្ចមួយ និងមើលទៅលើហេតុការណ៍សេដ្ឋកិច្ចទូទៅ។
◾ កុងក្លូមេរ៉៖ បណ្ដុំសហគ្រាសផលិតគ្រឿងសម្ភារៈ និងសេវាផ្សេងៗនៅក្នុងផ្នែកហិរញ្ញវត្ថុតែមួយ។
◾ ពហុដ្ឋាន៖ កន្លែងប្រមូលផ្ដុំសកម្មភាពអ្វីមួយ។
◾ វារីវប្បកម្ម៖ ការដាំដុះ ចិញ្ចឹមសត្វក្នុងទឹក។
◾ ជីវតិចណូឡូស៊ី៖ បច្ចេសទេស និងឧស្សាហកម្មដែលប្រើប្រាស់រូបធាតុសរីរាង្គមានជីវិតជាធម្មជាតិកែច្នៃទម្រង់ដោយមនុស្ស។

១. លក្ខខណ្ឌធម្មជាតិ

        លក្ខខណ្ឌធម្មជាតិប្រទេសកូរ៉េខាងត្បូងមិនសូវអនុគ្រោះខ្លាំងប៉ុន្មានទេសម្រាប់អភិវឌ្ឍសេដ្ឋកិច្ចជាតិ តែប្រទេសនេះបានទាញយកអស់លទ្ធភាពពីធនធានធម្មជាតិដែលខ្លួនមានមកប្រើប្រាស់៖
✔ អាងទន្លេសំខាន់ៗទាំង៣ជាទីប្រមូលផ្ដុំរស់នៅកុះករ និងមានទីក្រុងតូចធំជាច្រើន ដូចជារដ្ឋធានីសេអ៊ូល ទីក្រុងតេចុន ទីក្រុងតេគូ......។
✔ ទំនាបជាទីល្អប្រសើរសម្រាប់ការងារកសិកម្មដែលអាចបំពេញតម្រូវការបានគ្រប់គ្រាន់ខាងស្រូវ និងធញ្ញជាតិបន្ទាប់បន្សំ ក្រៅពីនេះគេអាចធ្វើនេសាទ និងវារីវប្បកម្មទៀតផង។
✔ ភាពសម្បូរឆ្នេរ ផ្ដល់ជម្រកធម្មជាតិដ៏ល្អប្រសើរដល់កំពង់ផែសមុទ្រនានា នៅទីនោះគេឃើញមានទីក្រុងកំពង់ផែជាច្រើនដូចជា ទីក្រុងអ៊ិនចុន ពូសាន អ៊ុលសាន...។
✔ ទោះបីប្រទេសនេះខ្សត់រ៉ែ និងថាមពល ធនធានធម្មជាតិ នៅលើទឹកដីកូរ៉េខាងត្បូង អាចជាទុនសម្រាប់ជួយទ្រទ្រង់ដំណើរការអភិវឌ្ឍសេដ្ឋកិច្ចមួយផ្នែកដែរ។
✔ អាកាសធាតុបង្កើតឱ្យមានរដូវ៤ ដែលមានសីតុណ្ហភាពមានភ្លៀងធ្លាក់ជាមធ្យម។
✔ ដែលអាចឱ្យមនុស្សរស់នៅបាន។

        សណ្ឋានដីកូរ៉េខាងត្បូងចែកជា ៤តំបន់គឺ៖
✔ តំបន់ភាគខាងកើត សម្បូរភ្នំខ្ពស់ៗ និងទំនាបឆ្នេរតូចចង្អៀត
✔ តំបន់ខាងលិច មានទំនាបឆ្នេរធំទូលាយ អាងទន្លេ និងទឹកដីរពើតរពើង
✔ តំបន់ភាគខាងនិរតី សម្បូរភ្នំ និងជ្រលង
✔ តំបន់ភាគអាគ្នេយ៍ ជាអាងទន្លេណាកដុងដ៏ធំទូលាយ។

        អាកាសធាតុនៅកូរ៉េខាងត្បូងចែកជា ៤រដូវ ច្បាស់លាស់៖
● សិសិរដូវ ត្រជាក់មានខ្យល់បក់បោក និងធ្លាក់ទឹកកក
● វស្សានរដូវ ក្ដៅ សើម និង មានភ្លៀងធ្លាក់
● និទាឃរដូវ និងសរទរដូវ មានរយៈពេលខ្លី ។

២. លក្ខខណ្ឌសង្គម

        កូរ៉េខាងត្បូងប្រកាន់យករបបនយោបាយប្រជាធិបតេយ្យ ក្នុងនោះនៅឆ្នាំ ២០០៧ កូរ៉េខាងត្បូង មានប្រជាជនសរុបចំនួន ៤៨,៤៥៦,៣៦៩នាក់ និងដង់ស៊ីតេប្រជាជនចំនួន ៤៩៨នាក់/Km² ។

        តំបន់ដែលមានកំណើនប្រជាជននៅប្រទេសកូរ៉េខាងត្បូងគឺ៖
➤ រដ្ឋធានីសេអ៊ូល
➤ ភាគខាងត្បូងពូសាន
➤ អ៊ុលសាន។

        ដំណើរប្រព្រឹត្តទៅនៃនគរូបនីយកម្មនៅប្រទេសកូរ៉េខាងត្បូង៖
➤ នគរូបនីយកម្មមានការរីកលូតលាស់ឆាប់រហ័ស ខ្វះការត្រួតពិនិត្យ នាំមកនូវបញ្ហាជាច្រើន។ ដោយឡែករដ្ឋធានីសេអ៊ូល ទីក្រុងពូសាន និងអ៊ុលសានទទួលបានការរីចម្រើនជាលំដាប់។
➤ នគរូបនីយកម្មបែបនេះតម្រូវឱ្យមាននយោបាយសាងសង់លំនៅស្ថានលក់ជូនប្រជាជនក្រុងថ្មីដែលកើនឥតឈប់ឈរ ដោយតម្លៃថោកតែមិនបានគ្រប់គ្រាន់ឡើយ។

៣. សេដ្ឋកិច្ចថ្មីមួយ
៣.១. មាគ៌ាអភិវឌ្ឍតាមបែបកូរ៉េខាងត្បូង

        មាគ៌ាអភិវឌ្ឍបែបកូរ៉េខាងត្បូងផ្អែកលើកត្តា៤យ៉ាងគឺ៖
✔ ភាពសម្បូរក្រុមហត្ថពលករនៅវ័យក្មេង ប្រកបដោយជំនាញ ការងារល្អ ទទួលបានប្រាក់ខែទាប។
✔ រដ្ឋអំណាចមួយដែលមាននៅគ្រប់ទីកន្លែងនៅបណ្ដាប្រទេសមូលធននិយម ផែនការកម្មមានលក្ខណៈប្រិតប្រៀនបំផុត។
✔ ការផ្ដល់ហិរញ្ញវត្ថុមួយដ៏ចម្លែក ៣០%នៃវិនិយោគទុនសរុបកាលពីមុនឆ្នាំ១៩៦៥ ហិរញ្ញវត្ថុផ្ដល់ដោយសហរដ្ឋអាមេរិចជាបន្តបន្ទាប់។
✔ ទម្ងន់នៃកុងក្លូមេរ៉ា កិច្ចសហប្រតិបត្តិការនានា សម្រាប់លំនាំចេញ។
        ប្រទេសកូរ៉េខាងត្បូងទទួលបានជោគជ័យពីកំណើនយ៉ាងឆាប់រហ័សនៃផលិតផលជាតិសរុប ដែលឆ្នាំ១៩៧០ មាន ៨ពាន់លានដុល្លា ឆ្នាំ១៩៨០ មាន ៥៦ពាន់លានដុល្លា ឆ្នាំ១៩៨៨ ឡើងដល់១៥០ពាន់លានដុល្លា និងសព្វថ្ងៃ ៩៧០ពាន់លានដុល្លារ។
        ប្រជាជនកូរ៉េខាងត្បូងទទួលបានប្រយោជន៍ដូចជា៖
✔ មានមុខរបរ និងការងារធ្វើគ្រប់ៗគ្នា
✔ បង្កើនប្រាក់ចំណូលគ្រួសារ
✔ ជីវភាពកើនឡើង
✔ ឈានចូលទៅក្នុងសម័យកាលបម្រើបម្រាស់

៣.២. សេដ្ឋកិច្ចមួយស្រួចស្រាល់

        ដំណើរការអភិវឌ្ឍឧស្សាហកម្ម ក្នុងប្រទេសកូរ៉េខាងត្បូងប្រព្រឹត្តទៅមាន៣ដំណាក់កាលគឺ៖
✔ ដំណាក់កាលឆ្នាំ១៩៧០ផលិតផលឧស្សាហកម្មមានតែគ្រឿងប្រើប្រាស់ វាយនភ័ណ្ឌ ស៊ីម៉ង់ត៍ ជី អាហារកំប៉ុង
✔ ដំណាក់កាលឆ្នាំ១៩៧២អភិវឌ្ឍលើផ្នែកគីមី ប្រេងកាត ដែកថែប គ្រឿងយន្ត និងនាវា
✔ ដំណាក់កាលឆ្នាំ១៩៨០ គេផ្ដោតទៅលើផលិតផលបច្ចេកវិទ្យាខ្ពស់ (អេឡិចត្រូនិច ជីវតិចណូឡូស៊ី ឧបករណ៍គ្រឿងរថយន្ត)។

        បន្តាប់ពីជោគជ័យក្នុងការអភិវឌ្ឍសេដ្ឋកិច្ច ក្នុងប្រទេសកូរ៉េខាងត្បូងប្រែប្រួលដូចជា៖
✔ ធ្វើឱ្យប្រទេសមានការអផិវឌ្ឍ និងជាប្រទេសឧស្សហកម្មលេចធ្លោមួយ
✔ ក្លាយជាប្រទេសដែលមានសេដ្ឋកិច្ចរឹងមាំ
✔ ជាប្រទេសដែលមានទីផ្សារប្រកួតប្រជែងរឹងមាំក្នុងទីផ្សារពិភពលោក។