(ជ១) មេរៀនទី៣៖ (មេរៀនសង្ខេប) ការរៀបចំឧស្សាហកម្មនៅលើពិភពលោក

និយមន័យ

◾ ឯកទេសកម្ម៖ ការធ្វើអ្វីមួយឲ្យមានលក្ខណៈពេញលេញក្នុងមុខរបរមួយ ឬ ក្នុងការងារមួយ។
◾ យន្តូបករណ៍៖ ម៉ាស៊ីនកែច្នៃរូបធាតុដោយប្រើមធ្យោបាយជាគ្រឿងចក្រដែលដាក់ឱ្យដំណើរការតាមរយៈចលនា ឬកម្លាំងកំណត់មួយ។
◾ ពហុដ្ឋានឧស្សាហកម្ម៖ បណ្ដុំឧស្សាហកម្មដ៏ធំធេងមួយដែលមានទំនាក់ទំនងទៅនឹងឧស្សាហកម្មចលករមួយ (ធ្យូង ដែកថែប គីមី វាយនភ័ណ្ឌ...) និងទទួលបានការរីកចម្រើនដោយសារកំណើនសកម្មភាពទាំងនោះ។
◾ ឧស្សាហូបនីយកម្ម៖ ជាឧស្សាហកម្មដើរដោយម៉ាស៊ីនស្វ័យប្រវត្តិ  ឬជាការបញ្ចូលគ្រឿងចក្រទៅក្នុងផ្នែកណាមួយនៃផលិតកម្ម។

១. វិសមភាពឧស្សាហូបនីយកម្មលើពិភពលោក

        ប្រទេសដែលក្លាយ ជាប្រទេសមហាអំណាចឧស្សាហកម្មនៅលើពិភពលោករួមមានសហរដ្ឋអាមេរិក រុស្ស៊ី ជប៉ុន ប្រទេសអឺរ៉ុប។ ប្រទេសទាំងនោះ បានជួបនឹងវិបត្តិឧស្សាហកម្ម ។ គេអាចដោះស្រាយវិបត្តិទាំងអស់នោះបានដោយសារ រក្សាជំហររឹងមាំតទៅទៀតដោយប្រើយុទ្ធវិធីផ្សេងៗដូចជាធ្វើស្វ័យប្រវត្តូបនីយកម្មឧស្សាហកម្មដែលមានវិបត្តិការបិទឧស្សាហកម្មដែលគ្មានចំណេញធ្វើឯកទេសកម្មសំដៅលើកកម្ពស់គុណភាពផលិតផល​ (ដែកថែប សម្លៀកបំពាក់ប្រណិត) និងការជួយពង្រឹងដើមទុន។

        ប្រទេសមហាអំណាច ជួបនឹងវិបត្តិ ឧស្សាហកម្មព្រោះ ៖
✔ តំហយចុះនៃបរិមាណផលិតផលឧស្សាហកម្ម (តម្រូវការរបស់ទីផ្សាររួមតូច និងតម្លៃខ្ពស់)
✔ ផ្នែកវាយនភណ្ឌមិនអាចទប់ទល់នឹងការ ប្រជែង ពីសំណាក់ប្រទេសកំពុងអភិវឌ្ឍ
✔ សម្ភារៈបរិក្ខារ មានការប្រកួតប្រជែងខ្លាំង
✔ ប្រទេសឧស្សាហកម្មថ្មីនៅលើពិភពលោកមាន២០ប្រទេសរួមមាន កូរ៉េខាងត្បូង តៃវ៉ាន់ សិង្ហបុរី ហុងកុង ឥណ្ឌា ម៉ាឡេស៊ី ហ្វីលីពីន ម៉ិកស៊ិក ប្រេស៊ីល .....
✔ ឧស្សាហកម្មប្រទេសក្រីក្រនាសតវត្សទី២០ មានសភាពដូចនៅប្រទេសអឺរ៉ុបកាន់ពីសតវត្សទី១៩  ដែរគឺ ឧស្សាហកម្មបានបង្កើតលក្ខខណ្ឌការងារ និងជីវភាពយ៉ាងតឹងតែងដល់ពលករ និងជាអ្នកបង្កើតភាពតោកយ៉ាកដល់មនុស្សទាំងប្រុសទាំងស្រីរួមទាំងកុមារផងដែរ។

        បានជាប្រទេសឧស្សាហកម្មថ្មីមានការរីកចម្រើន ដោយសារសម្បូរ៖
✔ សម្បូរធនធានមនុស្ស
✔ មានដើមទុន
✔ មានពលករជំនាញ
✔ មានបច្ចេកវិទ្យាទំនើប
✔ តម្លៃពលកម្មសមរម្យ...។

        ប្រទេសដែលធ្លាប់ស្ថិតក្រោមអាណានិគម មានភាពអន់ថយគឺដោយសារកង្វះ ៖
✔ ខ្វះធនធានមនុស្ស
✔ ខ្វះដើមទុន
✔ ខ្វះពលករជំនាញ
✔ ខ្វះបច្ចេកវិទ្យាទំនើប
✔ តម្លៃពលកម្មទាប...។

២. ទេសភាពឧស្សាហកម្ម

       គេមិនអាចមើលសហគ្រាសឧស្សហកម្មបានភ្លាមៗព្រោះវាស្ថិតនៅលាយឡំរាយប៉ាយក្នុងទីក្រុង ក្នុងភូមិតាមដងទន្លេឬក្នុងព្រៃ។

       បានជាសហគ្រាសឧស្សាហកម្មស្ថិតនៅលាយឡំរាយប៉ាយដូច្នេះដោយសារ៖
✔ នៅទីក្រុងសម្បូរកម្លាំងពលកម្មជិតទីប្រើប្រាស់
✔ ស្ថិតនៅក្នុងភូមិមានទីតាំងធំទូលាយ ដីតម្លៃធូថ្លៃប្រភពកម្លាំងកម្រិតរបៀរវត្សសមរម្យ
✔ តាមដងទន្លេងាយផ្គត់ផ្គង់ងាយដឹកជញ្ជូនទាញថាមពលអគ្គិសនីពីទឹកងាយបញ្ចេញកាកសំណល់
✔ ក្នុងព្រៃសម្បូររូបធាតុដើមងាយបញ្ចេញកាកសំណល់ និងប្រភពថាមពល។

       ផលប៉ះពាល់ដល់បរិស្ថាន គឺទទួលរងការបំពុលខ្យល់ ការបំពុលទឹកនៅពេលដែលគេបង្ហូរចូលនៅក្នុងស្ទឹងបឹង ព្រែក ទន្លេ បំពុលខ្យល់ ធ្វើឱ្យមានបម្រែបម្រួលអាកាសធាតុ បំពុលដីជាដើម…។