(ជ៣) មេរៀនទី២៖ (មេរៀនសង្ខេប) កោះតៃវ៉ាន់

និយមន័យ

◾ សម្ពាធប្រជាសាស្រ្ត៖ កម្លាំងសង្កត់ ឬការគាបសង្គត់ដែលបង្កើតឡើងដោយកំណើនប្រជាជន។
◾ អត្រាជាតិប្រមាណ៖ ជាផលធៀបរវាងចំនួនអ្នកកើតជាមួយនឹងចំនួនប្រជាជនមធ្យមគិតក្នុងមនុស្ស ១០០០នាក់។
◾ អត្រាមរណៈប្រមាណ៖ ជាផលធៀបរវាងចំនួនអ្នកស្លាប់ជាមួយនឹងចំនួនប្រជាជនមធ្យមគិតក្នុងមនុស្ស ១០០០នាក់។
◾ អាងសម្រុត៖ ផ្ទៃដីទ្វីប ឬផ្ទៃដីបាតសមុទ្រ ដែលរងនូវចលនាធរណី (តិចតូណិច) ហើយបាក់ស្រុតចុះបង្កើតបានជាដីទាប ឬជ្រលង។
◾ ភាសាម៉ង់ដារ៉ាំង៖ ទម្រង់គ្រាមភាសាចិន ប្រើប្រាស់ដោយជនជាតិចិនជាង70% ជាមូលដ្ឋាននៃភាសាផ្លូវការសព្វថ្ងៃគឺ ពូតុងហ័រ (Putonghua)។

១. លក្ខខណ្ឌធម្មជាតិ

        លក្ខខណធម្មជាតិកោះតៃវ៉ាន់អនុគ្រោះដល់ការអភិវឌ្ឍដូចខាងក្រោម៖
សកម្មភាពកសិកម្ម (វារីវប្បកម្ម ស្រូវ អំពៅ បន្លែ ផ្លែឈើ), សកម្មឧស្សាហកម្ម (វារីអគ្គិសនី អគ្គិសនីនុយគ្លេអ៊ែ ប្រេងកាត), សំណង់កំពង់ផែ ទីក្រុងតូចធំ ជាច្រើន និងអ័ក្សចម្បងនៃចរាចរណ៍។

        សណ្ឋានដីកោះតៃវ៉ាន់ត្រូវបានបែងចែកជា បីតំបន់គឺ ៖
✔ ប៉ែកខាងកើត គ្របដណ្ដប់ដោយជូរភ្នំបួនប្រសព្វគ្នាតាមទិសជើង ទៅត្បូង
✔ ប៉ែកខាងជើង មានភ្នំភ្លើងតែគ្មានមួយណាមានសកម្មភាពថ្មីៗកើតឡើងទេ
✔ ប៉ែកខាងលិច ជាតំបន់មានកូនភ្នំ រួមមានទំនាបឆ្នេរទាបតូចចង្អៀត។

        អាកាសធាតុនៅកោះតៃវ៉ាន់ មិនដូចគ្នាទេ គឺស្ថិតនៅក្រោមខ្សែត្រូចពិចខាងជើង និងក្រោមឥទ្ធិពលខ្យល់មូសុងអាកាសធាតុក្តៅហើយសើម ។ ប៉ែកអាគ្នេយ៍ភ្លៀងធ្លាក់រវាងខែឧសភា ដល់កញ្ញា ខាងជើងខាងកើតពីខែតុលា ដល់មករា។

២. លក្ខខណ្ឌសង្គម

        នៅឆ្នាំ ២០០៧ តៃវ៉ាន់ មានប្រជាជនសរុបចំនួន ២៣,១៧៤,២៩៤ នាក់ ដែលមានច្រើនស្រទាប់ជាប់ទាក់ទិនទៅនឹងវគ្គបន្តបន្ទាប់នៃដំណុះប្រជាជន ដង់ស៊ីតេប្រជាជននៃ កោះតៃវ៉ាន់ គិតជាមធ្យមមាន ៨៣៣នាក់/Km² ។

        ដំណុះប្រជាជនកោះតៃវ៉ាន់មាន៖
✔ ប្រជាជនម្ចាស់ស្រុក៖ គឺពួកសណ្ដានក្រោយនៃជនជាតិដើម មានប្រហែល៣០០,០០០នាក់ ដែលស្ថិតនៅក្នុងអំបូរ “ ម៉ាឡាយូ-មេឡានេស៊ី ” ឬ “ អូស្ត្រូនេស៊ី ” និងមានឈ្មោះកាវសាន ។
✔ ប្រជាជនចំណូលស្រុក៖ គឺភាគច្រើនមកពីខេត្តប៉ែកអាគ្នេយ៍នៃប្រទេសចិន និងពួកចិនជាតិនិយម ប្រមាណ ៣លាននាក់ ដែលភៀសខ្លួនមកកោះតៃវ៉ាន់ឆ្នាំ១៩៤៩ ។

៣. លក្ខខណ្ឌសេដ្ឋកិច្ច

        ការកសាងសេដ្ឋកិច្ចកោះតៃវ៉ាន់ផ្អែកលើកត្តា៖
✔ ការចូលជ្រៅទៅក្នុងទីផ្សារពិភពលោក ក្រោមកិច្ចការពារ ពីកងនាវាទី៧របស់សហរដ្ឋអាមេរិក។
✔ កម្លាំងពលកម្មដ៏ថ្លៃថ្លារបស់ប្រជាជន។
✔ ឧស្សាហកម្មហត្ថពលករ វាយនភ័ណ្ឌ និងអេឡិចត្រូនិច ជាមូលដ្ឋានជោគជ័យរបស់តៃវ៉ាន់។
✔ កម្លាំងសំខាន់នៃអេឡិចត្រូនិចរបស់តៃវ៉ាន់គឺរូបធាតុប្រផេះ (បញ្ញាវន្ត) ជានិស្សិតច្រើនជំនាន់ ដែលបានទទួលការសិក្សាអប់រំនៅសហរដ្ឋអាមេរិក និងត្រឡប់មកវិញក្នុងបំណងធ្វើឱ្យសម្បូរសប្បាយ។