(ជ៣) មេរៀនទី៤៖ (មេរៀនសង្ខេប) ប្រទេសសិង្ហបុរី

និយមន័យ

◾ អាកាសធាតុត្រូពិចមូសុង៖ ជាអាកាសធាតុក្តៅហើយសើមហើយមានរដូវ២ច្បាស់លាស់គឺរដូវប្រាំង និងរដូវវស្សា។
◾ ដង់ស៊ីតេប្រជាជន​៖ ជាផលធៀបរវាងប្រជាជន ​និង​ផ្ទៃដីនៅក្នុងមួយគីឡូម៉ែត្រការ៉េ។
◾ ព្រៃស្បាត៖ ព្រៃដែលប៉ែកខាងក្រោមញឹកជិត ទ្រុបទ្រុលចូលមិនចុះ។
◾ ព្រៃរងទឹកភ្លៀង៖ ព្រៃតំបន់ត្រូពិចដែលមានភ្លៀង និងសំណើមខ្ពស់ជាប្រចាំសម្បូរទៅដោយជីវៈចម្រុះ។

១. លក្ខខណ្ឌធម្មជាតិ

        សិង្ហបុរីមានកោះទាំងអស់ចំនួន៦៣ជាបុរីរដ្ឋមានផ្ទៃដីសរុបពី ៥៨១.៥Km² នៅឆ្នាំ១៩៦០ ដល់ ៧០៧.១Km² សព្វថ្ងៃ។ ប្រទេសនេះដោះស្រាយបញ្ហាខ្វះខាតដីសម្រាប់អភិវឌ្ឍដោយការវាយដណ្ដើមដីពីសមុទ្រ។ សិង្ហបុរីពុំមានទឹកគ្រប់គ្រាន់សម្រាប់ប្រើប្រាស់ទេ ដោយសារតែប្រទេសនេះមានផ្លូវទឹកខ្លីៗជាច្រើន និងមានអាងទឹកធម្មជាតិតិចតួច។
        គេដោះស្រាយបញ្ហានេះដោយនាំទឹកសាបចូលពីម៉ាឡេស៊ី តាមបំពង់បង្ហូរភ្ជាប់រវាង សិង្ហបុរី និង យោហូបារូ។

២. លក្ខខណ្ឌសង្គម

        សិង្ហបុរីមាននាមជាផ្លូវការថា “សាធារណរដ្ឋសិង្ហបុរី” មានរដ្ឋធានីឈ្មោះសិង្ហបុរីដែរ ។ ប្រធានាធិបតីមានអាណត្តិ ៦ឆ្នាំ ជ្រើសតាំងដោយរដ្ឋសភា ។ តាមជំរឿនឆ្នាំ ១៩៩០ ប្រជាជនសិង្ហបុរីមាន ២.៧លាននាក់ និងនៅឆ្នាំ១៩៩៨ មាន ៣.០៥លាននាក់ និងមានដង់ស៊ីតេ ៤,៧២០នាក់/Km² ហើយនៅឆ្នាំ២០០៩ ប្រជាជនមាន ៤,៩៨៧,៦០០នាក់ និងដង់ស៊ីតេប្រជាជន ៧០៥៣នាក់/Km²។

        គោលនយោបាយរបស់រដ្ឋាភិបាលប្រទេសសិង្ហបុរី ក្នុងការទប់ស្កាត់កំណើនប្រជាជនគឺ៖
✔ ផ្សព្វផ្សាយព័ត៌មានស្ដីពីវិធីពន្យាកំណើតយ៉ាងទូលំទូលាយ។
✔ ផ្សព្វផ្សាយពាក្យស្លោកដើម្បីកំណត់ចំនួនកូនក្នុងគ្រួសារ “សុភមង្គលគឺ គ្រួសារមានកូនពីរនាក់” ។
✔ ផ្ដល់នូវមធ្យោបាយផ្សេងៗក្នុងការកំណត់នូវផែនការគ្រួសារដូចជា រំលូត ក្រៀវ ដាក់កង ប្រើថ្នាំ...។
✔ ផ្ដល់ការលើកទឹកចិត្តដល់គ្រួសារណាដែលមានកូនតិច។

        សាសនាសំខាន់ៗនៅប្រទេសសិង្ហបុរីមាន៖
✔ ពុទ្ធសាសនិក ៣៩.១%
✔ តាវសាសនិក ២១.៩%
✔ អ៊ីស្លាមសាសនិក ១៤.៩%
✔ គ្រិស្តសាសនិក ១២.៩%
✔ ហិណ្ឌូសាសនិក ៣.៣%
✔ សាសនាផ្សេងៗទៀតមាន ០.៦%
✔ និង អ្នកអត់កាន់សាសនា ១៤.៥%

៣. លក្ខខណ្ឌសេដ្ឋកិច្ច

        ប្រទេសសិង្ហបុរីមានលក្ខខណ្ឌសេដ្ឋកិច្ចដូចតទៅ៖
✔ នៅទសវត្យរ៍ឆ្នាំ១៩៥០ សិង្ហបុរីជួបវិបត្តិ គ្មានការងារ ដូចនេះពួកគេចាប់ផ្ដើមជ្រើសយកឧស្សាហូបនីយកម្មពួកវិនិយោគថ្មីបានទាក់ទាញមូលធនបរទេស បង្កើតឧស្សាហកម្មសម្រាប់នាំចេញ ប្រើពលកម្មច្រើន ។
✔ ឆ្នាំ១៩៧០ បានដំឡើងថ្លៃឈ្នួលឱ្យកម្មករ ហើយរដ្ឋាភិបាលបានសម្រេចធ្វើ <បដិវត្តន៍ឧស្សាហកម្ម> ចុងក្រោយសិង្ហបុរីបានជំរុញឧស្សាហកម្មសំណង់អគ្គិសនី និងអេឡិចត្រូនិចនាំទៅអាមេរិក ។
✔ ទៅអនាគតគេគិតថាបុរីរដ្ឋនេះជាមជ្ឈមណ្ឌលស្រាវជ្រាវ និងអភិវឌ្ឍ សម្រាប់ក្រុមហ៊ុនពហុជាតិនានា ដោយការផ្ដល់ហេដ្ឋារចនាសម្ព័ន្ធដ៏ល្អប្រសើរ ។

        ការលំបាករបស់រដ្ឋាភិបាលនៅដើមទសវត្សឆ្នាំ ១៩៨០ រួមមាន៖
✔ បញ្ហានៃការរើសអើងរវាងប្រជាជនចិនភាគច្រើន និងប្រជាជនម៉ាឡេស៊ី ។
✔ បញ្ហាកំណើតទទួលបាន ការលើកទឹកចិត្តដោយរដ្ឋាភិបាលដែលកំពុងព្រួយបារម្ភពីការធ្លាក់ចុះអត្រាជាតិប្រមាណក្នុងពេលថ្មីៗជនជាតិចិនទាបជាងម៉ាឡេស៊ី និងឥណ្ឌា ។
✔ បញ្ហាអត្រាសន្សំ សម្រាប់ជួយផ្គត់ផ្គង់នយោបាយសាងសង់លំនៅស្ថានប្រកបដោយប្រសិទ្ធភាពរបស់រដ្ឋាភិបាល និងជួយមនុស្សចាស់ ។
✔ បញ្ហាធ្លាក់ចុះនៃអត្រាជាតិប្រមាណ ដោយជនជាតិចិនមានកំណើនទាបជាងជនជាតិម៉ាឡេស៊ី និងឥណ្ឌា។