(ជ៣) ​មេរៀនទី២៖ (សង្ខេបមេរៀន) ប្រទេសឥណ្ឌាបុរាណ

ជំពូកទី៣  ប្រវត្តិសាស្រ្តតំបន់ចិន និងឥណ្ឌា

មេរៀនទី២  ប្រទេសឥណ្ឌាបុរាណ

ពន្យល់ពាក្យ

• បន្ទាយ                 ៖ ទីកន្លែងបោះទីតាំងទ័ព ឬ ទីដីលើកខ្ពស់ ឬ កំពែងមាំមួនព័ទ្ធជុំវិញជារបាំងការពារសត្រូវ ។

• អារ្យ័ន                  ៖ ជាពួកជនស្បែកសមកពីតំបន់សមុទ្រកាសព្យែន ឬអ្នកមានអរិយធម៌ខ្ពង់ខ្ពស់ ។

• ពារាណសី            ៖ ឈ្មោះទីក្រុងក្នុងដែនកាសីប្រទេសឥណ្ឌា ។

• កប្បាស               ៖ ឈ្មោះដើមឈើតូចមួយប្រភេទជាដំណាំសំខាន់មានផ្លែបង្កើតជាសំឡី ។

• សាធារណៈ          ៖ ជាទូទៅ , ជារួម ។

• ព្រះអគ្និ                ៖ ភ្លើង ។

• សូទ្រ                   ៖ ទាសករ ។

• អាទិទេព              ៖ អ្នកដែលខ្លាំងពូកែ អំណាចអស្ចារ្យលើសមនុស្សធម្មតា។

• វណ្ណៈ                   ៖ ពណ៌សម្បុរ ថ្នាក់ ពូជពង្ស ក្រុម...(របស់មនុស្ស)។

• របបរាជាធិបតេយ្យ ៖ ជារបបមួយដែលមានព្រះរាជាមួយអង្គជាអ្នកដឹកនាំ ជាមេទ័ព ជាមេសាសនា និងជាចៅក្រម...។

១. ទីតាំងភូមិសាស្រ្ដ  និង ជនជាតិ

+ ទីតាំងភូមិសាស្រ្ដប្រទេសឥណ្ឌា៖

• ប្រទេសឥណ្ឌាស្ថិតនៅអាស៊ីខាងត្បូង ដែលសម្បូរទៅ

• ដោយភ្នំខ្ពស់ៗ ធំៗនិង វែងអន្លាយ។

• នៅខាងកើតជាប់នឹងឈូងសមុទ្របេងកាល់

• ខាងត្បូងជាប់និងមហាសមុទ្រឥណ្ឌា

• ខាងលិចជាប់ និងសមុទ្រអូម៉ង់

• ខាងជើង គឺជួរភ្នំហិមាល័យខណ្ឌប្រទេសចិន និងឥណ្ឌាមានបណ្ដោយប្រមាណ២ ០០០ គីឡូម៉ែត្រ

  និងភ្នំអេវើរែសខ្ពស់ជាងគេក្នុងពិភពលោកកម្ពស់ ៨៨៤៨ ម៉ែត្រ។

+ តើអរិយធម៌ប្រទេសឥណ្ឌាកើតមាននៅតំបន់ណាខ្លះ? 

- អរិយធម៌ប្រទេសឥណ្ឌាកើតមាននៅតំបន់ ទំនាបទន្លេឥណ្ឌូស ទន្លេគង្គា និងខ្ពង់រាបដេកង់។

+ តើជនជាតិឥណ្ឌាបានមកតាំងទីលំនៅលើទឹកដីឥណ្ឌាតាំងពីពេលណា? 

- ជនជាតិឥណ្ឌាបានមកតាំងទីលំនៅលើទឹកដីឥណ្ឌាតាំងពី យុគថ្មបំបែក និង យុគថ្មលោហៈ ។

 + តើជនជាតិដើមរបស់ឥណ្ឌាមានឈ្មោះអ្វីខ្លះ?

\( \diamond \) ជនជាតិដើមឥណ្ឌាមាន៖

• ពួកមុណ្ឌៈ រស់នៅតាមជួរភ្នំហិមាល័យ 

• ពួកដ្រាវីត រស់នៅលើខ្ពង់រាបដេកង់ ។ 

២. អរិយធម៌នៅតាមដងទន្លេឥណ្ឌូស

+ តើឥណ្ឌាមានអរិយធម៌សំខាន់ៗអ្វីខ្លះ? 

- ឥណ្ឌាមានអរិយធម៌សំខាន់ៗដូចជា កូឌីស៊ី និងមោហិនសូដារ៉ូ និង ហារ៉ាប៉ា។

+ ក្នុងចំណោមអរិយធម៌ទាំងអស់ តើអរិយធម៌មួយណាដែលចាស់ជាងគេ?

- ក្នុងចំណោមអរិយធម៌ទាំងអស់អរិយធម៌ដែលចាស់ជាងគេគឺ អរិយធម៌កូឌីស៊ី។

២.១. អរិយធម៌កូឌីស៊ី

អរិយធម៌កូឌីស៊ី ជាតំបន់មួយដែលមានអរិយធម៌ចំណាស់ជាងគេនៅតាមដងទន្លេឥណ្ឌូស

ដែលមានអាយុកាលប្រមាណ៣០០០ឆ្នាំ មុនគ្រិស្តសករាជអរិយធម៌កូឌីស៊ីគេប្រទះឃើញមាន

បន្ទាយប្រាការ ក្រុងពីរ ពាងពណ៌ ចានពណ៌ និងមានគំនូរលម្អផង។ ក្រៅពីនោះ មានខ្សែក ខ្សែដៃ

ធ្វើអំពីសំបកខ្យងខ្ចៅ និង ឧបករណ៍ធ្វើអំពីថ្ម។

២.២. អរិយធម៌មោហិនសូដារ៉ូ និងហារ៉ាប៉ា

ក្រុងធំទាំងពីរនេះមានអាយុកាលប្រមាណ ២៥០០ ឆ្នាំមុនគ្រិស្តសករាជ ។ អរិយធម៌មោហិនសូដារ៉ូ

មានដូចជាសំណង់ផ្ទះច្រើនជាន់ធ្វើអំពីឥដ្ឋ គ្រឹះស្ថានងូតទឹកសាធារណៈលូបង្ហូរទឹកសំអុយ និងមានវិថីខ្វាត់ខ្វែង។

+  តើសិប្បករ នាសម័យនោះប៉ិនប្រសប់ខាងធ្វើអ្វីខ្លះ? 

- សិប្បករនាសម័យនោះប៉ិនប្រសប់ខាងធ្វើ លោហៈធ្វើជារូបចម្លាក់ ពូថៅ ដាវ លំពែង...។

- គេចេះត្បាញកប្បាស ចិញ្ចឹមសត្វ ដាំដំណាំនិងធ្វើជំនួញជាមួយ អេហ្ស៊ីប និង តំបន់មេសូប៉ូតាមី។

៣. ការលុកលុយរបស់ពួកអារ្យ័ន (២០០០ឆ្នាំ-១៥០០ឆ្នាំមុនគ.ស.)

+ តើជនជាតិអារ្យ័នមកពីណា? 

- ជនជាតិអារ្យ័នមកពីតំបន់សមុទ្រកាសព្យែន ដែលស្ថិតនៅព្រំប្រទល់ទ្វីបអឺរ៉ុប និងទ្វីបអាស៊ី។

+ តើពួកអារ្យ័នបានវាយលុកនិងត្រួតត្រាប្រទេសឥណ្ឌានៅឆ្នាំណា? 

- ពួកអារ្យ័នបានវាយលុក និងត្រួតត្រាប្រទេសឥណ្ឌាចាប់ពីឆ្នាំ២០០០ឆ្នាំ-១៥០០ឆ្នាំមុនគ.ស. ។

+ ក្រោយពីវាយលុកប្រទេសឥណ្ឌាតើពួកអារ្យ័នបានធ្វើដូចម្តេច? 

- ក្រោយពីបានវាយលុកឥណ្ឌា ពួកអារ្យ័នបានទៅដល់ខ្ពង់រាបដេកង់ទៀត តែត្រូវពួកដ្រាវិតវាយច្រានឱ្យ ត្រឡប់ក្រោយវិញ។

  ពួកអារ្យ័នក៏បង្ខំចិត្តរស់នៅប្រទេស ឥណ្ឌាប៉ែកខាងជើង និងកណ្តាល ដោយបានបង្កើតឱ្យមានអរិយធម៌ថ្មីលាយឡំ

  អរិយធម៌ ជនជាតិឥណ្ឌាដើម រៀងមក។

៤ . អរិយធម៌ឥណ្ឌាអារ្យ័ន

+ តើពួកអារ្យ័នបានបង្កើតអ្វីខ្លះឱ្យឥណ្ឌា?  

- ពួកអារ្យ័នបានបង្កើតឱ្យឥណ្ឌារួមមានអរិយធម៌ជា ច្រើនដូចជា៖

  ជំនឿ សាសនា របបគ្រប់គ្រងរដ្ឋ វប្បធម៌ និងវណ្ណៈសង្គម។

៤.១. នយោបាយ-សង្គម

+ តើប្រជាជនឥណ្ឌាប្រកបមុខរបរអ្វីខ្លះ? 

- ប្រជាជនឥណ្ឌាប្រកបមុខរបរដាំដំណាំ ចិញ្ជឹាមសត្វ (គោ ចៀម សេះចម្បាំង) ក្រៅពីនោះជាសិប្បករ

  មានជាងដែក ទង់ដែង ត្បាញ ធ្វើអាវុធ រទេះចម្បាំង និងជាពាណិជ្ជករធ្វើជំនួញតាមផ្លូវសមុទ្រជាមួយអារ៉ាប់ និងមេសូប៉ូតាមី។ 

៤.២.  វណ្ណៈនៅសង្គមឥណ្ឌាបុរាណ

+ ហេតុអ្វីបានជានៅឥណ្ឌាមានវណ្ណៈសង្គម?

- បានជានៅឥណ្ឌាមានវណ្ណៈសង្គមព្រោះដោយសារពួកអារ្យ័នបានក្លាយជាអ្នកគ្រប់គ្រងលើអ្វីៗ ទាំងអស់ដូចជា៖

  ដីស្រែចម្ការ និងសិទ្ធិគ្រប់គ្រងសង្គម។

+ ចូរប្រាប់ពីវណ្ណៈសង្គមនៅឥណ្ឌា។

- វណ្ណៈសង្គមនៅឥណ្ឌាមាន៤គឺ៖

១. វណ្ណៈព្រាហ្មណ៍ ៖ គឺពួកបុព្វជិត ( សម្លៀកបំពាក់ពណ៌ស )

២. វណ្ណៈក្សត្រ       ៖ គឺពួកអ្នកចម្បាំង ព្រះអង្គម្ចាស់ អភិជន ( សម្លៀកបំពាក់ពណ៌ក្រហម )

៣. វណ្ណៈវៃស្យៈ      ៖ គឺពួកកសិករ សិប្បករ ពាណិជ្ជករ... ( សំលៀកបំពាក់ពណ៌លឿង )

៤. វណ្ណៈសូទ្រ        ៖ គឺពួកទាសករ ខ្ញុំកំដរ...  ( សម្លៀកបំពាក់ពណ៌ខ្មៅ ) ។

៤.៣. ជំនឿ-សាសនា

\( \diamond \) ជនជាតិឥណ្ឌា-អារ្យ័នមានជំនឿលើអាទិទេពច្រើនអង្គរួមមាន៖

• ព្រះភិរុណ (ទេវតាភ្លៀង)

• ព្រះឥន្រ្ទ (ទេពតារន្ទះ)

• ប្រឹថវី (ទេវីផែនដី)

• ព្រះអគ្គិ (ទេពតាការពារក្រុមគ្រួសារ)

• ព្រះសូរ្យ (ទេពតាព្រះអាទិត្យ)

• ព្រះវិស្ណុ (ទេពតារក្សាលោក)

• ព្រះសិវៈ ឬឥសូរ (ទេពតាបំផ្លាញលោក)

• ព្រះព្រហ្ម (ទេពតាបង្កើតលោក)។

+ តើពួកអារ្យ័នបានបង្កើតសាសនាអ្វី?  

- ក្រៅពីនេះពួកអារ្យ័នបានបង្កើតសាសនាព្រាហ្មណ៌ដោយពួកគេឈប់ជឿរលើទេវៈ

  ច្រើនទៀតហើយ។

+ តើទេវ:សំខាន់ៗក្នុងសាសនាព្រាហ្មណ៌មានអ្វីខ្លះ? 

- ទេវៈសំខាន់ៗក្នុងសាសនាព្រាហ្មណ៌រួមមាន ៖ ព្រះព្រហ្ម ព្រះវិស្ណុ និងព្រះឥសូរ ឬសិវៈ ។