រូបភាពទី1៖ ព្យុះភ្លៀងកើតពីច្របល់បរិយាកាស
ព្យុះ ជាបាតុភូតធម្មជាតិមួយដែលតែងតែកើតឡើងនៅលើផ្ទៃមហាសមុទ្រឬទ្វីប។ ផ្លេកបន្ទោរ ជាការផ្ទេរបន្ទុកអគ្គិសនីដ៏ធំមួយដែលកើតឡើងរវាងបន្ទុកផ្ទៃពីរខុសគ្នា (ប៉ូលបូក និងប៉ូលដក) ។ ព្យុះភ្លៀង ជាបណ្តុំបរិយាកាសដែលបង្កឱ្យមានខ្យល់បក់ខ្លាំង ភ្លៀងធំ ផ្លេកបន្ទោរ និងរន្ទះ។ ព្យុះភ្លៀងកើតឡើងដោយកត្តាពីរសំខាន់គឺ ភាពច្របល់បរិយាកាស និងសំណើមអាកាស។ ព្យុះភ្លៀងកើតឡើងនៅពេលខ្យល់ក្តៅអណ្តែតឡើងលើយ៉ាងលឿននៅក្នុងច្របល់បរិយាកាស។
នៅពេលខ្យល់ក្តៅទៅដល់ចំណុចកកចំហាយទឹកនៅក្នុងខ្យល់កក បង្កើតបានជាពពកផ្កាស្ពៃ (Cummulus) ។ បើសិនភាពច្របល់បរិយាកាសកាន់តែខ្លាំង ខ្យល់ក្តៅនៅតែបន្តអណ្អែតឡើងលើបង្កើតបានជាពពក (Cumulonimbus) ធំខ្មៅនៅកម្ពស់ជាង 15km។
យើងមិនអាចមើលឃើញពន្លឺផ្លេកបន្ទោរក្នុងពេលតែមួយនឹងសំឡេងផ្គរ ពន្លឺធ្វើដំណើរលឿនជាងសំឡេង យើងអាចមើលឃើញពន្លឺភ្លាមៗ ប៉ុន្តែសំឡេងធ្វើដំណើរ 1km ក្នុងរាល់ 3 វិនាទី ដូច្នេះយើងអាចមើលឃើញផ្លេកបន្ទោរមុន បន្ទាប់មកទើបលឺផ្គរលាន់តាមក្រោយ។
រូបភាពទី2៖ ខ្យល់កួចតណាត
ខ្យល់កួចតណាត ពពកមានរាងជាឡាវ ហើយវិលនៅផ្នែកខាងក្រោមឡាវកួចនេះ ខ្យល់មានសម្ពាធខ្លាំង។ វាកើតឡើងនៅនិទាឃរដូវ នាពេលព្រឹកព្រលឹមនិងពេលរសៀល វាមានអង្កត់ផ្ចិតប្រហែល 0.4km កម្ពស់ជាមធ្យម 6km ល្បឿនខ្យល់ខ្លាំងលើសពី 350 km/1ម៉ោង។
រូបភាពទី3៖ ខ្យល់ព្យុះទីផុង ឬហ៊ូរីកាន ឬស៊ីក្លូន
ហ៊ូរីកាន ជាខ្យល់ព្យុះដ៏ធំ និងមានកម្លាំងខ្លាំងមួយនៅលើផែនដី ហើយតែងតែកើតឡើងនៅក្នុងប្រព័ន្ធធាតុអាកាសត្រូពិចជាមួយល្បឿនខ្យល់យ៉ាងហោចណាស់ 119kh/h ។ នៅមហាសមុទ្រប៉ាស៊ីហ្វិកខាងលិចគេហៅវាថា ខ្យល់ព្យុះទីផុង។ នៅលើមហាសមុទ្រឥណ្ឌាគេហៅវាថា ខ្យល់ព្យុះស៊ីក្លូន។ ហ៊ូរីកាន ជាទូទៅកើតនៅតំបន់ចន្លោះរយៈទទឹងទី 5° និង 20° ខាងជើង និងខាងត្បូងលើមហាសមុទ្រតំបន់ត្រូពិចក្តៅ។ ព្យុះនេះមានអង្កត់ផ្ចិតពី 160km ទៅ 1500km ហើយអាចធ្វើដំណើរបានរាប់ពាន់គីឡូម៉ែត្រ។
រូបភាពទី4៖ព្រំខ្យល់ក្តៅ
លក្ខណៈសំគាល់នៃម៉ាសខ្យល់មួយគឺ សំណើមនិងសីតុណ្ហភាពដែលបានមកពីតំបន់ម៉ាសខ្យល់នោះកកើត។ តំបន់នេះហៅថា តំបន់ប្រភព។ ម៉ាសខ្យល់គ្របដណ្តប់រាប់ពាន់គីឡូម៉ែត្រការ៉េ។ គេចែកម៉ាសខ្យល់ដោយផ្អែកទៅលើសីតុណ្ហភាព និងសំណើមរបស់វាមានម៉ាសខ្យល់ត្រជាក់ ម៉ាសខ្យល់ក្តៅ ម៉ាសខ្យល់សើម និងម៉ាសខ្យល់ស្ងួតដោយផ្អែកលើតំបន់ប្រភព។
រូបភាពទី5៖ ព្រំខ្យល់ត្រជាក់
ព្រំខ្យល់ គឺកើតឡើងនៅពេលម៉ាសខ្យល់ពីជួបគ្នាដែលបង្កើតឲ្យមានផ្ទៃខណ្ឌមួយ។ ព្រំខ្យល់ជាផ្ទៃខណ្ឌរវាងម៉ាសខ្យល់ពីរដែលមានសីតុណ្ហភាព និងសំណើមខុសគ្នា។ ធាតុអាកាសនៅតាមព្រំខ្យល់តែងតែមានពពកនិងព្យុះកើតឡើង។ ព្រំខ្យល់ក្តៅកើតឡើងនៅពេលម៉ាសខ្យល់ក្តៅជួបនិងបក់ពីលើម៉ាសខ្យល់ត្រជាក់។ ព្រំខ្យល់ក្តៅ នាំភ្លៀង និងរលឹមមកជាមួយផង។ ព្រំខ្យល់ត្រជាក់កើតឡើងនៅពេលម៉ាសខ្យល់ត្រជាក់ជួបនិងចូលជំនួសម៉ាសខ្យល់ក្តៅ ព្រោះខ្យល់ត្រជាក់ធ្ងន់ធ្វើចលនាក្រោមខ្យល់ក្តៅស្រាល និងរុញវាឱ្យឡើងលើ។ ព្រំខ្យល់ត្រជាក់អាចធ្វើចលនាលឿនបង្កឱ្យមានព្យុះភ្លៀង ភ្លៀងធំ ឬព្រិល។ ព្រំខ្យល់នឹងកើតឡើងនៅពេលម៉ាសខ្យល់ពីរជួបគ្នាគ្មានចលនាបង្កើត។ ធាតុអាកាសកើតពីព្រំខ្យល់នឹងភាគច្រើនស្រដៀងគ្នានឹងធាតុអាកាសរបស់ព្រំខ្យល់ក្តៅដែរ។ ព្រំខ្យល់កួច កើតឡើងពីម៉ាសខ្យល់ត្រជាក់ធ្វើចលនាលឿនជាងម៉ាសខ្យល់ក្តៅ។ នៅពេលដែលម៉ាសខ្យល់ត្រជាក់ជួបម៉ាសខ្យល់ក្តៅបានបង្ខំឱ្យម៉ាសខ្យល់ក្តៅអណ្តែតឡើង។