(ជ៣) មេរៀនទី៣៖ (មេរៀនសង្ខេប) ប្រព័ន្ធអង់ដូគ្រីន

១. ក្រពេញនិងអរម៉ូន
១.១ ក្រពេញ

ក្រពេញ ជាសរីរាង្គដែលកើតឡើងពីកោសិកាអេពីតេល្យូម។ វាមានឯកទេសកម្ម ក្នុងការបញ្ចេញសារធាតុសម្រាប់សារពាង្គកាយ។ ក្រពេញមាន ២យ៉ាងគឺ ក្រពេញអ៊ិចសូគ្រីន និងក្រពេញអង់ដូគ្រីន។

    ·  ក្រពេញអ៊ិចសូគ្រីន ឬក្រពេញបញ្ចេញក្រៅជាក្រពេញមានបំពង់នាំ មាននាទីបញ្ចេញរសតាមបំពង់នាំ។ ក្រពេញអ៊ិចសូគ្រីនមានក្រពេញញើស ក្រពេញទឹកមាត់ ក្រពេញរសរំលាយអាហារ ក្រពេញភេទ លំពែង(ជាក្រពេញអ៊ិចសូគ្រីនផង និងក្រពេញអង់ដូគ្រីនផង ហៅថាក្រពេញចម្រុះ)។
    ·  ក្រពេញអង់ដូគ្រីន ឬក្រពេញបញ្ចេញក្នុងជាក្រពេញដែលគ្មានបំពង់នាំ មាននាទីបញ្ចេញអរម៉ូនទៅក្នុងចរន្តឈាមដោយផ្ទាល់។

១.២ អរម៉ូន (Hormone)

អរម៉ូន ជាសារធាតុគីមីដែលមានឥទ្ធិពលទៅលើមេតាបូលីសនៃកោសិកាគោលដៅ។ កោសិកាគោលដៅជាកោសិកាដែលភ្ជាប់ជាមួយអរម៉ូនយថាប្រភេទមួយ។ អរម៉ូន អាចភ្ញោចកោសិកាគោលដៅដោយបង្កើន ឬបន្ថយសកម្មភាពរបស់វា។ លក្ខណៈបែបនេះអាស្រ័យដោយការប្រែប្រួលនៃអត្រាប្រតិកម្មគីមីជីវៈណាមួយនៅក្នុង កោសិកាគោលដៅ។

១.៣ ចលនាការនៃអំពើរបស់អរម៉ូន

គេចែកអរម៉ូនជា២ ក្រុមគឺ៖
   ·   អរម៉ូនប៉ិបទីត ជាប្រូតេអ៊ីនធំៗដែលកើតពីច្រវ៉ាក់នៃអាស៊ីតអាមីនេ វាមិនរលាយក្នុងលីពីតទេ។ ដូចនេះ វាមិនអាចឆ្លងកាត់ភ្នាសកោសិកាបានទេ។
   ·  អរម៉ូនស្តេរ៉ូអ៊ីត ជាលីពីតដែលត្រូវបានផលិតឡើងពី កូលេសស្តេរ៉ុល។ វាមានលទ្ធភាពឆ្លងកាត់ភ្នាសកោសិកា។

   ក. អរម៉ូនប៉ិបទីត

អរម៉ូនប៉ិបទីត រួមមានអរម៉ូនរបស់ក្រពេញអ៊ីប៉ូភីស ប៉ារ៉ាទីរ៉ូអ៊ីត អាំងស៊ុយលីន និងគ្លុយកាកុង វាត្រូវបានសំយោគក្រោមការដឹកនាំរបស់សែនក្នុងកោសិកាក្រពេញអង់ដូគ្រីន។ អរម៉ូនប៉ិបទីត មានឥទ្ធិពលលើដំណើរប្រព្រឹត្តរបស់កោសិកាគោលដៅដោយធ្វើឱ្យអង់ស៊ីម អាដេនីលស៊ីក្លាសដែលភ្ជាប់លើផ្ទៃខាងក្នុងនៃភ្នាសកោសិកាគោលដៅសកម្មឡើង។

   ខ. អរម៉ូនស្តេរ៉ូអ៊ីត (Hormone steroid)

អរម៉ូនស្តេរ៉ូអ៊ីត មានអរម៉ូនដែលផលិតឡើងដោយក្រពេញលើតម្រងនោម អូវែ ពងស្វាស។ វាជាអរម៉ូនរលាយក្នុងលីពីត ដូចនេះ វាអាចឆ្លងកាត់ភ្នាសកោសិកាបានយ៉ាងងាយ។ អរម៉ូនស្តេរ៉ូអ៊ីតមានឥទ្ធិពលលើដំណើររបស់កោសិកាគោលដៅ។ សែនឯកទេស មួយក្នុងកោសិកាគោលដៅត្រូវបានភ្ញោចឱ្យសកម្មឡើង ដើម្បីសំយោគ។

២. ការត្រួតពិនិត្យនៃប្រព័ន្ធអង់ដូរគ្រីន

ក្រពេញអង់ដូរគ្រីនសំយោគអរម៉ូននៅពេលដែលសារពាង្គកាយត្រូវការ ហើយប្រសិទ្ធិភាពបរិមាណអរម៉ូននៅក្នុងឈាមត្រូវស្ថិតក្នុងដែនកំណត់មួយច្បាស់លាស់។ សកម្មភាពរបស់ក្រពេញអង់ដូរគ្រីនត្រូវបានពិនិត្យដោយចលនការតំណបត្រឡប់អវិជ្ជមាន។ តាមរយៈតំណបត្រឡប់អវិជ្ជមាន មានកំហាប់របស់សារធាតុមួយចំនួននៅក្នុងឈាមពន្លឿន ឬបង្អាក់ការបញ្ចេញរបស់ក្រពេញចលនការត្រឡប់អវិជ្ជមានមាននាទីតំហែរក្សាលំនឹងនៃមជ្ឈដ្ឋានខាងក្នុង។ 

៣. ប្រព័ន្ធអង់ដូរគ្រីនមនុស្ស

ចំពោះមនុស្ស ប្រព័ន្ធអង់ដូរគ្រីនកើតឡើងពីក្រពេញអង់ដូគ្រីនផ្សេងៗជាច្រើន ដូចជា អ៊ីប៉ូតាឡាមុស ក្រពេញទីរ៉ូអ៊ីត ក្រពេញប៉ារ៉ាទីរ៉ូអ៊ីត ក្រពេញទីមុស ក្រពេញលើតម្រងនោម លំពែង ក្រពេញភេទញី ក្រពេញភេទឈ្មោល...។

៣.១ ​អ៊ីប៉ូតាឡាមុស (Hypothalamus)

អ៊ីប៉ូតាឡាមុសជាផ្នែកមួយនៃខួរក្បាលដែលតម្រូវមជ្ឈដ្ឋានក្នុងសាពាង្គកាយនិងមាននាទីត្រួតពិនិត្យការបញ្ចេញ របស់ក្រពេញអ៊ីប៉ូភីស។
ក្រពេញអ៊ីប៉ូតាឡាមុសផលិតអរម៉ូន២យ៉ាងគឺ អង់ទីឌីអ៊ុយរេទិចនិងអុកស៊ីតូស៊ីន រួចស្តុកទុកក្នុងក្រពេញអ៊ីប៉ូភីសក្រោយ។

៣.២ ក្រពេញអ៊ីប៉ូភីស (Hypophyse)

អ៊ីប៉ូភីស ជាក្រពេញតូចមួយដែលមានអង្កត់ប្រហែល ១ ស.ម ដែលស្ថិតនៅខាងក្រោម អ៊ីប៉ូតាឡាមុស​។ អ៊ីប៉ូភីសចែកជា២ផ្នែកគឺ អ៊ីប៉ូភីសមុខ និងអ៊ីប៉ូភីសក្រោយ។

   ក. អ៊ីប៉ូភីសក្រោយ

អ៊ីប៉ូភីសក្រោយ មាននាទីផ្ទុកនិងបញ្ចេញអរម៉ូនអង់ទីឌីអ៊ុយរេទិច និងអរម៉ូនអុកស៊ីតូស៊ីន។
   ·   អង់ទីឌីអ៊ុយរេទិច (ADH= Antidiuretique Hormone) មាននាទីភ្ញោចតម្រងនោមឱ្យមានសម្រូបទឹកនោមឡើងវិញ។
   ·   អុកស៊ីតូស៊ីន (Ocytocine) មាននាទីភ្ញោចស្បូនឱ្យកន្រ្តាក់ក្នុងរយៈពេលសម្រាលកូន។

   ខ. អ៊ីប៉ូភីសមុខ

អ៊ីប៉ូភីសមុខផលិតអរម៉ូន៦ប្រភេទខុសៗគ្នាគឺ

   ·   អរម៉ូនលូតលាស់ (GH= Growth Hormone) មាននាទីជំរុញការលូតលាស់នៃសារពាង្គកាយ។
   ·   អរម៉ូនប្រូឡាក់ទីន(PRL= Prolactin hormone) មាននាទីជំរុញការលូតលាស់ក្រពេញទឹកដោះ និង  ផលិតទឹកដោះ។
   ·   អរម៉ូនមេឡាណូស៊ីតស្ទីមុយឡង់ (MSH= Melanocyte Stimulante Hormone) ភ្ញោចកោសិកាមេឡាណូស៊ីតនៃស្បែកឱ្យផលិតមេឡានីន។
   ·   អរម៉ូនទីរ៉េអូស្ទីមុយលីន(TSH=Thyreo Stimuline hormone) ភ្ញោចក្រពេញទីរ៉ូអ៊ីតឱ្យផលិតទីរ៉ុកស៊ីន។
   ·   អរម៉ូនអាត្រេណូករទីកូត្រូប(ACTH= Adreno Cortico Trope Hormone) ភ្ញោចករតិចលើតម្រងនោមឱ្យផលិតអរម៉ូនករទីសូល។
   ·   អរម៉ូនកូណាដូស្ទីមុយលីន (FSH= Folliculo Stimuline Hormone= Gonadostimuline Hormone) និង អរម៉ូន LH= Luteinisante មាននាទីភ្ញោច សរីរាង្គភេទឱ្យបញ្ចេញអរម៉ូនភេទ។

៣.៣ ក្រពេញទីរ៉ូអ៊ីត(Glande  Thyroide)

ក្រពេញទីរ៉ូអ៊ីត ស្ថិតនៅត្រង់ក ចំពីក្រោយបំពង់សំឡេង និងនៅខាងមុខបំពង់ខ្យល់។ វាមាននាទីផលិតអរម៉ូន   ទីរ៉ុកស៊ីន។ កង្វះជាតិអ៊ីយ៉ូតបណ្ដាលឱ្យកើតជំងឺពក-ក ដោយក្រពេញទីរ៉ូអ៊ីតរីកធំ ដើម្បីបង្ការកុំឱ្យកើតជំងឺពក-ក ត្រូវបរិភោគអាហារមានជាតិអ៊ីយ៉ូតដូចជាត្រី និងអាហារសមុទ្រផ្សេងៗ។  អរម៉ូនទីរ៉ុកស៊ីនកំណត់អត្រាមេតាបូលីសនៅក្នុងសាយរពាង្គកាយវាបង្កើនអត្រា មេតាបូលីស ប្រូតេអ៊ីន គ្លុយកូស និងខ្លាញ់។ កំណើនកម្រិតអរម៉ូនទីរ៉ុកស៊ីន បណ្ដាលឱ្យមានកំណើនអត្រាដង្ហើមកោសិកាគឺកោសិកាផលិតថាមពលច្រើនហើយក្លាយជាសកម្មខ្លាំង។

៣.៤ ក្រពេញប៉ារ៉ាទីរ៉ូអ៊ីត (Glande Parathyroide)

ក្រពេញប៉ារ៉ាទីរ៉ូអ៊ីត ជាក្រពេញរាងពងក្រពើតូចៗចំនួន៤ ដែលបង្កប់ក្នុងផ្នែកខាងក្រោយនៃក្រពេញទីរ៉ូអ៊ីត។​ វាមាននាទីបញ្ចេញអរម៉ូនប៉ារ៉ាទីរ៉ូអ៊ីត(PTH)សម្រាប់តម្រូវមេតាបូលីស កាល់ស្យូម និងផូស្វាត។ កាល់ស្យូមចាំបាច់សម្រាប់ការលូតលាស់ឆ្អឹង ធ្មេញ កំណកឈាម លំនាំប្រសាទ និងការកន្រ្តាក់សាច់ដុំ។ ផូស្វាតមាននៅក្នុងឆ្អឹង និងជាសមាសធាតុសំខាន់ៗជាច្រើននៃសារពាង្គកាយរួមបញ្ចូលទាំង ATP AND និងARN ផងដែរ។

   ·    កង្វះអរម៉ូនប៉ារ៉ាទីរ៉ូអ៊ីត(PTH) បណ្ដាលឱ្យកម្រិតកាល់ស្យូម ក្នុងឈាមទាបនាំឱ្យសាច់ដុំជាប់ឆ្អឹង ប្រែជារួសហួសហេតុហើយកន្រ្តាក់យ៉ាងខ្លាំងគឺ ជំងឺតេតាណូស។
   ·    ការលើសអរម៉ូនប៉ារ៉ាទីរ៉ូអ៊ីត(PTH)ហួសហេតុបណ្ដាលឱ្យមានការបញ្ចេញកាល់ស្យូមពីឆ្អឹងមកវិញដែលធ្វើឱ្យឆ្អឹងប្រែជាស្រួយងាយបាក់។

អរម៉ូនប៉ារ៉ាទីរ៉ូអ៊ីត មាននាទី៖

   ·    ភ្ញោចតម្រងនោមឱ្យបញ្ចេញផូស្វាត (PO₄^3-) នៅពេល កាល់ស្យូម Ca²⁺ ភ្ជាប់ក្នុងឆ្អឹងមានតិចស្ថិតក្រោមទម្រង់ជាកាល់ស្យូមផូស្វាត(Ca₃(PO₄)₂)។
   ·    សម្រូបកាល់ស្យូម Ca²⁺ឡើងវិញដើម្បីបង្កើនអត្រាជាតិកាល់ស្យូម។
   ·    បញ្ចេញអង់ស៊ីមដែលធ្វើឱ្យវីតាមីនDសកម្ម ដើម្បីបង្កើនការស្រូបយកកាល់ស្យូម Ca²⁺របស់ពោះវៀន។

៣.៥ ក្រពេញលើតម្រងនោម(Surrenales Glande)

តម្រងនោម​ មនុស្សមានក្រពេញ ២ ដែលក្រពេញនីមួយៗមានទម្ងន់ប្រហែល ១២ ក្រាម ហើយលក្ខណៈពិសេសរបស់វាសម្បូរទៅដោយបណ្ដាញសរសៃប្ដូរ។

ក្រពេញនីមួយៗមាន ២ផ្នែកគឺ៖
   ·    ផ្នែកខាងក្រៅ ហៅថា ក្រពេញករតិចលើតម្រងនោម។
   ·    ផ្នែកខាងក្នុង ហៅថា ក្រពេញខួរលើតម្រងនោម។

   ក.ក្រពេញខួរលើតម្រងនោម (glande medullo-surrenale)

ក្រពេញខួរលើតម្រងនោម មានមុខងារបញ្ចេញអរម៉ូនអេពីណេព្រីន(ឬអាដ្រេណាលីន) និងអរម៉ូនណូអេពីណេព្រីន។
   ·    ណូអេពីណេព្រីន មានមុខងារសកម្មក្នុងការដឹកនាំអាំងភ្លុចទៅកោសិកាក្បែរៗវានិងមានឥទ្ធិពលទៅលើការកន្រ្តាក់រួមតូចនៃសរសៃវ៉ែន។
    ·    អេពីណេព្រីន ឬអាដ្រេណាលីនមានមុខងារបង្កើនអត្រាចង្វាក់បេះដូង កំណើនកំហាប់គ្លុយកូស និង   អត្រាកំណកឈាមក្នុងសរសៃឈាម វាក៏បណ្ដាលឱ្យរន្ធប្រស្រីភ្នែករីកធំ និងបង្រួមសរសៃឈាមក្រោមស្បែកដែលធ្វើឱ្យស្បែកឡើងស្លាំងនិងបណ្ដាលឱ្យញ័រ។

   ខ. ក្រពេញករតិចលើតម្រងនោម (Glande Cortico-Surrenale)

ក្រពេញករតិចលើតម្រងនោម ផលិតអរម៉ូន២យ៉ាងគឺ ករទីសូល និង អាល់ដូស្តេរ៉ូន។

    ·    អរម៉ូនករទីសូល(Cortico-SurrenaleGlande)មាននាទីភ្ញោចអ៊ីដ្រូលីសប្រូតេអ៊ីនឱ្យទៅអាស៊ីតអាមីនេ ចូលក្នុងឈាម ធ្វើឱ្យកម្រិត គ្លុយកូស ក្នុងឈាមឡើងខ្ពស់ នៅពេលថ្លើមបំប្លែងអាស៊ីតអាមីនេ ទាំងនេះទៅជាគ្លុយកូស។ អរម៉ូនករទីសូល ស្ថិតក្រោមការត្រួតពិនិត្យរបស់ ក្រពេញអ៊ីប៉ូភីសមុខដោយបញ្ចេញ អរម៉ូនអាដ្រេណូករទីដ្រូពិច(ACTH) ដោយអ៊ីប៉ូតាឡាមុសផលិតអរម៉ូនករទីដ្រូពិចលើ (CRH= Corticotropin Releasing Hormone) ទៅភ្ញោច អ៊ីប៉ូភីសមុខ។

   ·    អរម៉ូនអាល់ដូស្តេរ៉ូន (Aldosterone) ធ្វើឱ្យតម្រងនោមស្រូបយកសូដ្យូម (Na⁺) ឡើងវិញ និងបញ្ចេញប៉ូតាស្យូម(K⁺)ចោល។ អរម៉ូនអាល់ដូស្តេរ៉ូន មិនស្ថិតក្រោមការត្រួតពិនិត្យរបស់អ៊ីប៉ូភីសមុខទេ។

៣.៦ លំពែង (Pancreas)

លំពែង ជាសរីរាង្គមួយវែងសណ្ដូកទទឹងក្នុងពោះ និងនៅពីលើពោះវៀនតូច។ លំពែងមាននាទីផលិតអរម៉ូនអាំងស៊ុយលីន និងគ្លុយកាកុង។

លំពែងជាក្រពេញអង់ដូគ្រីនផង និងអ៊ិចសូគ្រីនផងព្រោះ៖
   ·    ក្រពេញអាស៊ីនុស បញ្ចេញរសរំលាយអាហារទៅក្នុងពោះវៀនតូចតាមបំពង់លំពែង(ជាក្រពេញអ៊ិចសូគ្រីន)។
   ·    ក្រពេញអ៊ីឡូឡង់សេរ៉ង់ ក្នុងលំពែងបញ្ចេញអរម៉ូនដោយផ្ទាល់ទៅក្នុងឈាម(ជាក្រពេញអង់ដូគ្រីន)។

   ក. អាំងស៊ុយលីន (Insulin)

កោសិកាបេតា ( β  ) បញ្ចេញអរម៉ូនអាំងស៊ុយលីន។ អរម៉ូនអាំងស៊ុយលីនមាននាទីបន្ថយជាតិស្ករនៅក្នុងឈាម។

   ខ. គ្លុយកាកុង (Glucagon)

កោសិកាអាល់ហ្វា( α  ) បញ្ចេញអរម៉ូនគ្លុយកាកុងទៅក្នុងឈាមដោយផ្ទាល់។ អរម៉ូនគ្លុយកាកុងមាននាទីបង្កើនកម្រិតជាតិស្ករនៅក្នុងឈាម។

    គ. ជំងឺទឹកនោមផ្អែម

ជំងឺទឹកនោមផ្អែមកើតឡើងនៅពេលដែល អ៊ីឡូឡង់សេរ៉ង់ ផលិត អាំងស៊ុយលីន មិនបានគ្រប់គ្រាន់បណ្ដាលឱ្យបរិមាណគ្លុយកូស ក្នុងឈាមកើនឡើងហើយតម្រងនោមមិនអាចស្រូបយកគ្លុយកូសទាំងអស់ឡើងវិញបាន។ ដូចនេះ គ្លុយកូស ដែលលើសត្រូវបានបញ្ចេញទៅក្នុងទឹកនោម។ ជំងឺទឹកនោមផ្អែម មានរោគសញ្ញាដូចជា ការស្រកទម្ងន់ការស្រេកទឹកខ្លាំង និងការចុះខ្សោយកម្លាំង។ គេអាចព្យាបាលជំងឺនេះ ដោយឱ្យអ្នកជំងឺមានរបបអាហារត្រឹមត្រូវ លេបថ្នាំឱ្យបានទៀងទាត់ និងចាក់អាំងស៊ុយលីនជារៀងរាល់ថ្ងៃ។

៣.៧ ក្រពេញភេទ (Sex Glande)

ក្រពេញភេទ មាននាទីភ្ញោចការលូតលាស់ប្រដាប់បន្តពូជ និងបញ្ចេញអរម៉ូន LH និងអរម៉ូន FSH ភ្ញោចការបញ្ចេញអរម៉ូនភេទពីអូវែ និងពងស្វាស។

   ក. អូវែ (Ovary)

អូវែ ជាក្រពេញអង់ដូគ្រីនដែលផលិតអរម៉ូនអឺស្រ្តូសែន និងប្រូសេស្តេរ៉ូន។

   ·    អឺស្រ្តូសែន៖ ត្រូវបានផលិតចេញពីកោសិកាផូលីគុលនៃអូវែ ដោយឆ្លើយតបនឹងការភ្ញោចរបស់FSH ។ អំពើរបស់វាធ្វើឱ្យស្រទាប់ភ្នាសសើមស្បូនឡើងក្រាស់ដោយបង្កើតចំណែកមីតូសនៃកោសិកា។ វាក៏មានឥទ្ធិពលទៅលើលក្ខណៈរបស់មនុស្សស្រីដែរ។

   ·    ប្រូសេស្តេរ៉ូន៖ ការភ្ញោចរបស់ LH បណ្ដាលឱ្យផូលីគុលដឺក្រាប ផ្ទុះបែក និងបញ្ចេញអូវុល មក​ក្រៅ ព្រមទាំងបញ្ចេញអរម៉ូនប្រូសេស្តេរ៉ូន និងអឺស្រ្តូសែនផងដែរ។ អរម៉ូននេះភ្ញោចភ្នាសសើមស្បូនឱ្យឡើងក្រាស់ត្រៀមសំរាប់កាច់សំបុក។ ប្រូសេស្តេរ៉ូនថែរក្សាគភ៌ ដោយបណ្ដាលឱ្យសាច់ដុំស្បូនសម្រាក និងមានឥទ្ធិពលទៅលើការលូតលាស់ របស់ក្រពេញទឹកដោះផងដែរ។ ឯអង្គលឿងបន្តការផលិត ប្រូសេស្តេរ៉ូនរហូតដល់ខែទី៤ នៃការមានផ្ទៃពោះ ហើយខែបន្ទាប់ជានាទីរបស់សុកត្រូវបំពេញបន្ត។

   ខ. ពងស្វាស (Testes)

ពងស្វាស បញ្ចេញអរម៉ូនមនុស្សប្រុសគឺ អង់ដ្រូសែន។ អង់ដ្រូសែនសំខាន់ជាងគេគឺ តេស្តូស្តេរ៉ូន។ FSH ភ្ញោចកោសិកាស៊ែតូលីក្នុងបំពង់សេមីនីភែ ដើម្បីធានាកំណកាម៉ែត និងLH ភ្ញោចកោសិកាអាំងទែស្ទីស្យែលឱ្យបញ្ចេញអរម៉ូនតេស្ដូស្តេរ៉ូន។ អរម៉ូននេះធ្វើឱ្យកាន់តែប្រសើរឡើងនូវការលូតលាស់លក្ខណៈភេទបន្ទាប់របស់មនុស្សប្រុស ដូចជា សំឡេងគ្រលរ ដុះពុកចង្កា...។

៣.៨ ក្រពេញទីមុស (Thymus)

ក្រពេញទីមុស ស្ថិតនៅខាងលើទ្រូងក្បែរបេះដូងវាមានទំហំធំក្នុងវ័យកុមារហើយ រួញតូចក្រោយ ពេលគ្រប់ការ។ ក្រពេញទីមុសផលិត អរម៉ូនទីម៉ូស៊ីន។ អរម៉ូនទីម៉ូស៊ីនភ្ញោច និងផលិតឡាំផូស៊ីតថ្មីនៅក្នុងក្រពេញទឹករងៃ និងក្នុងសរីរាង្គដទៃទៀត។

៣.៩ ក្រពះ និងពោះវៀនតូច

ប្រដាប់រំលាយអាហារក៏មានផលិតអរម៉ូនដែរគឺ
   ·    កោសិកាភ្នាសក្រពះបញ្ចេញ អរម៉ូនកាស្រ្ទីន(Gastrine) ភ្ញោចឱ្យមានរំហូតរសក្រពះ។
   ·    កោសិកាភ្នាសពោះវៀនតូចផលិត អរម៉ូនសេក្រេនទីន(Socretine) ភ្ញោចឱ្យមានរំហូររសលំពែង។