(ជ៣) មេរៀនទី៥៖ (មេរៀនសង្ខេប) ប្រទេសកូរ៉េ

១. តើប្រទេសកូរ៉េមានទីតាំងស្ថិតនៅឯណា? តើមានព្រំប្រទល់ជាប់ប្រទេសណាខ្លះ? 
ចំ. ប្រទេសកូរ៉េស្ថិតនៅអាស៊ីបូព៌ា។ ប្រទេសកូរ៉េមានព្រំប្រទល់ជាប់៖
- ចិន និងរុស្សី
- អមដោយសមុទ្រ ២គឺ ខាងកើតជាប់នឹងសមុទ្រជប៉ុន(សមុទ្រខាងកើត) និងខាងលិចជាប់នឹងសមុទ្រលឿង ។

២. ក្រោយសង្រ្គាមលោកលើកទី២ ប្រទេសកូរ៉េត្រូវបែងចែកជា ...... គឺ ........ និង ...............................។
ចំ. ក្រោយសង្រ្គាមលោកលើកទី២ ប្រទេសកូរ៉េត្រូវបានបែងចែកជា ពីរ គឺ សាធារណរដ្ឋកូរ៉េខាងត្បូង និងសាធារណរដ្ឋប្រជាធិបតេយ្យប្រជាមានិតកូរ៉េ ឬកូរ៉េខាងជើង ។

៣. តើសាធារណរដ្ឋកូរ៉េខាងត្បូងមានរដ្ឋធានីឈ្មោះអ្វី? 
ចំ. ប្រទេសសាធារណរដ្ឋកូរ៉េខាងត្បូងមានរដ្ឋធានីឈ្មោះ សេអ៊ូល។

៤. តើសាធារណរដ្ឋប្រជាធិបតេយ្យប្រជាមានិតកូរ៉េ ឬកូរ៉េខាងជើងមានរដ្ឋធានីឈ្មោះអ្វី? 
ចំ.សាធារណរដ្ឋប្រជាធិបតេយ្យប្រជាមានិតកូរ៉េ ឬកូរ៉េខាងជើងមានរដ្ឋធានីឈ្មោះ ព្យុងយ៉ាង។

៥. តើបុព្វបុរសនៃជនជាតិកូរ៉េបានមករស់នៅឧបទ្វីបនេះប្រហែលប៉ុន្មានឆ្នាំមុន?
ចំ. បុព្វបុរស នៃជនជាតិកូរ៉េបានមករស់នៅឧបទ្វីបនេះប្រហែល ៧០០ ពាន់ឆ្នាំមុន។

ខ្លឹមសារទី១  ប្រទេសកូរ៉េមុន និងក្រោយសង្រ្គាមលោកលើកទី១

១. តើឆ្នាំ ១៩១០ មានអ្វីកើតឡើងលើប្រទេសកូរ៉េ?
ចំ. នៅឆ្នាំ១៩១០ មានព្រឹត្តិការណ៍កើតគឺ៖
- របបចក្រពត្តិនិយមបានដាក់កូរ៉េជាទឹកដីអាណានិគមជប៉ុន
- ប្រើកម្លាំងបង្ក្រាប និងសម្លាប់រង្គាលអ្នកស្នេហាជាតិកូរ៉េដែលជាមេចលនាប្រឆាំងនឹងជប៉ុន។

២. តើក្នុងសម័យអាណានិគមជប៉ុន ពួកជប៉ុនបានធ្វើដូចម្ដេចខ្លះ ចំពោះកូរ៉េ?
ចំ. ក្នុងសម័យអាណានិគមជប៉ុន ពួកជប៉ុនបាន៖
- ឆក់ប្លន់ទ្រព្យសម្បត្តិ និងប្រមូលផលិតផល កសិកម្ម ដើម្បីយកទៅប្រទេសជប៉ុន
- ប្រទេសកូរ៉េបានក្លាយជាមូលដ្ឋានសម្រាប់ផ្គត់ផ្គង់ និងទីផ្សាររបស់ពួកជប៉ុន
- ជប៉ុនបានដាក់ពង្រាយទ័ពតាមទីក្រុងទូទាំងប្រទេសកូរ៉េ។

៣. តើចលនាបដិវត្តន៍ចិនក្នុងឆ្នាំ១៩១១ ជះឥទ្ធិពលអ្វីដល់ចលនាតស៊ូកូរ៉េដែរឬទេ?
ចំ. ចលនាបដិវត្តន៍ចិនក្នុងឆ្នាំ១៩១១ បានជះឥទ្ធិពលយ៉ាងខ្លាំងជាពិសេសគឺការបង្កើតរបបសាធារណរដ្ឋចិនដែលមានចែងយ៉ាងច្បាស់អំពីសិទ្ធិរបស់ពលរដ្ឋ។

៤. នៅថ្ងៃទី០១ ខែមីនា ឆ្នាំ ១៩១៩ តើមានរឿងអ្វីកើតឡើងនៅកូរ៉េ? តើជប៉ុនបានធ្វើដូចម្តេច?
ចំ. នៅថ្ងៃទី០១ ខែមីនា ឆ្នាំ ១៩១៩ មានប្រជាជនកូរ៉េយ៉ាងច្រើនបានប្រមូលផ្ដុំគ្នានៅតាមក្រុង១០ ក្នុងនោះមានក្រុងសេអ៊ូលផងដែរ បានស្រែកទាមទារឯករាជ្យ។ ជប៉ុនបានឆ្លើយតបវិញ ដោយប្រើហិង្សា ការកាប់សម្លាប់ និងចាប់ដាក់គុក។ ពួកបាតុករដែលទាមទារឯករាជ្យអស់ជាច្រើននាក់យ៉ាងឃោរឃៅបំផុត។

៥. តើនៅឆ្នាំ១៩៣២ អង្គការសមាគមអ្នកសេ្នហាជាតិមានផែនការអ្វី ចំពោះអធិរាជជប៉ុន?ដឹកនាំដោយអ្នកណា?
ចំ. នៅឆ្នាំ១៩៣២ អង្គការសមាគមអ្នកសេ្នហាជាតិមានផែនការធ្វើគត់ដោយដាក់គ្រាប់បែកដឹកនាំដោយជនស្នេហាជាតិ គីមគូ ។

៦. តើការធ្វើគត់ព្រះចៅហ៊ីរ៉ូស៊ីតូ ដោយវិធីណា?នៅឯណា? 
ចំ. ការធ្វើគត់ព្រះចៅ ហ៊ីរ៉ូស៊ីតូ ដោយការដាក់គ្រាប់បែកនៅក្នុងទិវារំលឹកថ្ងៃកំណើតព្រះចៅដែលប្រារព្ធធ្វើឡើងនៅក្រុងស៊ាងហៃ។

៧. តើចលនាបះបោរឆ្នាំ១៩១៩ ទទួលបានលទ្ធផលដូចម្តេច? 
ចំ. ចលនាបះបោរឆ្នាំ១៩១៩ មិនបានទទួលជោគជ័យឡើយ ហើយគេបានត្រឹមតែសម្រេចបង្កើតរដ្ឋាភិបាលកូរ៉េបណ្តោះអាសន្នមួយនៅក្រៅប្រទេសតែប៉ុណ្ណោះ។

ខ្លឹមសារទី២  ប្រទេសកូរ៉េមុន និងក្រោយសង្រ្គាមលោកលើកទី២

១. តើនៅឆ្នាំណាដែលជប៉ុនចូលលុកលុយខេត្តម៉ាន់ជូរី?ហើយបានប្តូរឈ្មោះខេត្តនេះទៅជាអ្វីវិញ?
ចំ. នៅឆ្នាំ១៩៣១ ដែលជប៉ុនបានចូលលុកលុយខេត្តម៉ាន់ជូរី បានប្តូរឈ្មោះទៅជាភាសាជប៉ុនគឺ ម៉ាន់ជូគូ ។

២. តើឆ្នាំណាដែលជប៉ុនធ្វើសង្រ្គាមជាមួយចិន? 
ចំ. នៅឆ្នាំ១៩៣៧ បានធ្វើសង្រ្គាមជាមួយចិន។

៣. តើជប៉ុនបានប្រកាសសង្រ្គាមជាមួយអាមេរិកនៅឆ្នាំណា?
ចំ. នៅឆ្នាំ១៩៤១ ជប៉ុនលុកលុយពេញទ្វីបអាស៊ី និងប្រកាសសង្រ្គាមជាមួយអាមេរិកទៀត។

៤. តើក្នុងច្បាប់កំណែនឆ្នាំ១៩៣៨ ជប៉ុនបានធ្វើអ្វីខ្លះចំពោះពលរដ្ឋកូរ៉េ?
ចំ. ក្នុងច្បាប់កំណែនឆ្នាំ១៩៣៨ ជប៉ុនបានប្រមូលស្បៀង និងកេណ្ឌយុវជនកូរ៉េឱ្យចូលធ្វើសង្រ្គាមលោកលើកទី២​ នៅតាមរណសិរ្សទាំងឡាយក្នុងតំបន់អាស៊ីប៉ាស៊ីភិច  ឯស្រ្តីកូរ៉េត្រូវជប៉ុនចាប់យកទៅធ្វើជាទាសករផ្លូវភេទយោធាជប៉ុននៅលើសមរភូមិ មិនតែប៉ុណ្ណោះជប៉ុនបានបំបាត់វប្បធម៌កូរ៉េដោយហាមមិនឱ្យមានភាសាកូរ៉េព្រមទាំងប្ដូរឈ្មោះកូរ៉េ មកជាឈ្មោះ ជប៉ុន។

៥. តើចលនាតស៊ូកូរ៉េរួមជាមួយចិនបង្កើតក្នុងឆ្នាំ?ដើម្បីអ្វី? 
ចំ. ចលនាតស៊ូកូរ៉េ រួមជាមួយចិនបង្កើតក្នុងឆ្នាំ១៩៣០ ដើម្បីទាមទារឯករាជ្យនៅក្នុងតំបន់ដែលត្រួតត្រាដោយពួកគួមិញតាង និងពួកកុម្មុយនីស្តចិន។

៦. តើឆ្នាំណាដែលកូរ៉េបង្កើតរដ្ឋាភិបាលបណ្តោះអាសន្ន? 
ចំ. កូរ៉េបានបង្កើតរដ្ឋាភិបាលបណ្តោះអាសន្ននៅឆ្នាំ១៩៤០ ។

៧. តើរដ្ឋាភិបាលបណ្តោះអាសន្នដឹកនាំដោយអ្នកណា?តើមានទិសដៅអ្វី? 
ចំ. រដ្ឋាភិបាលបណ្តោះអាសន្នដឹកនាំដោយ លោកគីមហ្គូ មានទិសដៅបង្កើតរដ្ឋទំនើបមួយដោយឈរលើគោលការណ៍លទ្ធិប្រជាធិបតេយ្យតាមទម្រង់របបសាធារណរដ្ឋតាមការបោះឆ្នោតជាសកល ពលរដ្ឋម្នាក់ៗមានសិទ្ធិស្មើគ្នាខាងកសិកម្ម និងអប់រំ។

៨. តើជប៉ុនចុះចាញ់សង្រ្គាមលោកលើកទី២ នៅថ្ងៃ ខែឆ្នាំណា?
ចំ.ជប៉ុនចុះចាញ់សង្រ្គាមលោកលើកទី២ នៅថ្ងៃទី១៥ ខែសីហា  ឆ្នាំ ១៩៤៥ ។

៩. ក្រោយពេលជប៉ុនចាញ់សង្រ្គាម តើប្រទេសកូរ៉េបានក្លាយជាបែបណា? 
ចំ. នៅក្រោយពេលដែលជប៉ុនចាញ់សង្រ្គាម ឧបទ្វីបកូរ៉េទាំងមូលត្រូវបានរំដោះទាំងស្រុង ទ័ពមហាអំណាចទាំងពីរបានកាន់កាប់ឧបទ្វីបនេះដោយបែងចែកជាពីរតាមខ្សែរស្របទី៣៨។

១០. តើកូរ៉េខាងត្បូងកាន់កាប់ដោយអ្នកណា? 
ចំ. កូរ៉េខាងត្បូងកាន់កាប់ដោយ អាមេរិក។

១១. តើកូរ៉េខាងជើងកាន់កាប់ដោយអ្នកណា? 
ចំ.កូរ៉េខាងជើងកាន់កាប់ដោយ សូវៀត។

១២. តើក្នុងឆ្នាំណាដែលមានការប្រជុំបង្កើតរដ្ឋាភិបាលកូរ៉េតែមួយ?ទទួលបានជោគជ័យឬទេ?ព្រោះអ្វី?
ចំ. ក្នុងឆ្នាំ១៩៤៦ និង ១៩៤៧ មិនទទួលជោគជ័យទេ ដោយសារសង្រ្គាមត្រជាក់ផ្ទុះឡើង។

១៣. តើនៅថ្ងៃទី១៥ ខែសីហា ឆ្នាំ១៩៤៨មានអ្វីកើតឡើងនៅឧបទ្វីបកូរ៉េ?
ចំ. នៅថ្ងៃទី១៥ ខែសីហា ឆ្នាំ១៩៤៨ កូរ៉េខាងត្បូងបានបង្កើតរដ្ឋាភិបាលរបស់ខ្លួនដោយការបោះឆ្នោតស្របតាមដំណោះស្រាយរបស់អង្គការសហប្រជាជាតិ។

១៤. តើនៅថ្ងៃទី៩ ខែកញ្ញា ឆ្នាំ១៩៤៨ មានអ្វីកើតឡើងនៅកូរ៉េខាងជើង?
ចំ. នៅថ្ងៃទី ០៩ ខែកញ្ញា ឆ្នាំ១៩៤៨ កូរ៉េខាជើងបានប្រកាសបង្កើតសាធារណរដ្ឋប្រជាធិបតេយ្យកូរ៉េខាងជើង ។

១៥. តើសង្រ្គាមកូរ៉េកើតឡើងនៅថ្ងៃ ខែ ឆ្នាំណា? តើបានបញ្ចប់នៅថ្ងៃ ខែ ឆ្នាំណា? 
ចំ. សង្រ្គាមនៅកូរ៉េនៅថ្ងៃទី២៥ ខែមិថុនា ឆ្នាំ១៩៥០ នៅថ្ងៃទី២៧ ខែ កក្កដា ឆ្នាំ១៩៥៣ នៅពេលកូរ៉េទាំងពីរចុះកិច្ចព្រមព្រៀងបញ្ចប់សង្រ្គាម។

១៦. តើសង្រ្គាមកូរ៉េជាសង្គ្រាមដូចម្តេច? ព្រោះអ្វី? 
ចំ. សង្រ្គាមនេះជាសង្រ្គាមបង្ហូរឈាមដ៏ធំមួយនៅក្នុងប្រវត្តិសាស្រ្តសង្រ្គាមលើពិភពលោក ដោយសារមហាអំណាចទាំងពីរបានប៉ះទង្គិចគ្នាដោយផ្ទាល់នៅលើសមរភូមិ។

១៧. តើក្នុងសង្រ្គាមនេះបានផ្ដល់ផលលំបាកអ្វីខ្លះ? 
ចំ. ក្នុងសង្រ្គាមនេះបានផ្ដល់ផលលំបាកដូចជា៖
- ប្រជាជនកូរ៉េខាងត្បូងប្រហែលជាង១លាននាក់បានស្លាប់
- ច្រើនលាននាក់ទៀតបាត់បង់ជម្រក
- អាមេរិកបាត់បង់យន្តហោះជាង២០០០គ្រឿង ឯសូវៀតអស់ជាង ១០០០គ្រឿង។

១៨. តើនៅកូរ៉េខាងត្បូងប្រកាន់របបអ្វី?
ចំ. កូរ៉េខាងត្បូងប្រកាន់របបសាធារណរដ្ឋដែលមានរដ្ឋាភិបាលឡើងកាន់អំណាចដោយការជ្រើសតាំងដោយប្រជាពលរដ្ឋ។

១៩. តើកូរ៉េខាងត្បូងមានខេត្តប៉ុន្មាន?ក្រុងប៉ុន្មាន? 
ចំ. កូរ៉េខាងត្បូងមានខេត្ត ៩ និងក្រុង ៦ ។

២០.តើនៅកូរ៉េខាងត្បូងមានគណបក្សនយោបាយធំៗ ចំនួនប៉ុន្មាន? តើមានគណបក្សណាខ្លះ?
ចំ. នៅកូរ៉េខាងត្បូងមានគណបក្សធំៗចំនួន២គឺ
- គណបក្សជាតិធំ ជាគណបក្សដែលតែងតែទទួលបានជោគជ័យ។
- គណបក្សប្រជាធិបតេយ្យ ជាគណបក្សប្រឆាំង។

២១.តើកូរ៉េខាងត្បូងមានទ័ពប៉ុន្មានប្រភេទ?តើសរុបចំនួនប៉ុន្មាន? 
ចំ. កូរ៉េខាងត្បូងមានទ័ព៣ប្រភេទគឺ៖
- ទ័ពថ្មើរជើង
- ទ័ពអាកាស
- ទ័ពជើងទឹក
សរុបចំនួនប្រហែល ៦០០ ពាន់នាក់។

២២. តើនៅកូរ៉េខាងត្បូង ប្រជាពលរដ្ឋមានកាតព្វកិច្ចដូចម្ដេច?
ចំ. នៅកូរ៉េខាងត្បូង ប្រជាពលរដ្ឋដែលមានអាយុ១៧ ឆ្នាំរហូតដល់ ៣០ឆ្នាំ ត្រូវចូលបំរើកងទ័ពរយៈពេល២ឆ្នាំចំពោះស្ត្រីគឺតាមការស័្មគ្រចិត្ត។

២៣. តើគណបក្សកុម្មុយនីស្ដរបស់កូរ៉េខាងជើងដឹកនាំដោយអ្នកណា? 
ចំ. គណបក្សកុម្មុយនីស្ដរបស់កូរ៉េខាងជើងដឹកនាំដោយលោក គីម អ៊ីលស៊ុង ជាប្រមុខរដ្ឋ និងជាអគ្គលេខាធិការមជ្ឈឹមបក្សកុម្មុយនីស្តកូរ៉េ ។

២៤. តើកូរ៉េខាងជើងមានខេត្តប៉ុន្មាន?ក្រុងប៉ុន្មាន? 
ចំ. កូរ៉េខាងជើងមានខេត្ត ៩ ក្រុង ចំនួន៤ ។

២៥. តើកូរ៉េខាងជើងមានកងទ័ពប៉ុន្មានប្រភេទ?ចំនួនប៉ុន្មាននាក់?
 ចំ. កូរ៉េខាងជើងមានកងទ័ព ៣ប្រភេទ មានចំនួន១លាននាក់ និងកងស្វ័យត្រាណ ៥លាននាក់ ផ្សេងទៀត ។

២៦. តើសេដ្ឋកិច្ចកូរ៉េមានការរីកចម្រើនដូចគ្នាដែរឬទេ?
ចំ. សេដ្ឋកិច្ចមានការរីកចម្រើនមិនដូចគ្នាទេ។

២៧. តើនៅមុនសង្គ្រាម ឆ្នាំ១៩៥៣ សេដ្ឋកិច្ចកូរ៉េមានលក្ខណៈដូចម្ដេច? 
ចំ. នៅមុនសង្គ្រាមឆ្នាំ១៩៥៣ សេដ្ឋកិច្ចកូរ៉េបានលូតលាស់យ៉ាងឆាប់រហ័ស មិនតែប៉ុណ្ណោះវិស័យគមនាគមន៍ពាណិជ្ជកម្ម និងដឹកជញ្ជូនមានការរីកចម្រើនគួរឱ្យកត់សម្គាល់។

២៨.តើកូរ៉េខាងត្បូងមានឧស្សាហកម្មផ្នែកអ្វីខ្លះ? 
ចំ. នៅកូរ៉េខាងត្បូងមានឧស្សាហកម្មគឺ សម្លៀកបំពាក់ ស្បែកជើង ក្រណាត់ (កំណាត់សំពត់) ចំណី អាហារ រោងចក្រគីមី ជី គ្រឿងម៉ាស៊ីន ផលិតផលដែកថែបនិងសំណង់នាវា។

២៩. តើចាប់ពីឆ្នាំ១៩៧០ ដល់ ១៩៨០  កូរ៉េខាងត្បូងចាប់ផ្តើមនាំផលិតផលអ្វីចេញខ្លះ?
ចំ. ចាប់ពីឆ្នាំ១៩៧០ ដល់ ១៩៨០ កូរ៉េខាងត្បូងចាប់ផ្តើម៖
- នាំផលិតផលចេញមាន រថយន្ត កុំព្យូទ័រ គ្រឿងអេឡិចត្រូនិច គ្រឿងអុបទិច ទូរទស្សន៍ ក្រដាស ក្តារបន្ទះ ព័រសឺឡែន ។

៣០. តើកូរ៉េខាងត្បូងមានធនធានក្រោមដីអ្វីខ្លះ? 
ចំ. កូរ៉េខាងត្បូងមានធនធានក្រោមដីដូចជា៖
- ដែក
- សំណ
- និងស័ង្កសីជាដើម។

៣១. តើដៃគូពាណិជ្ជកម្មរបស់កូរ៉េខាងត្បូងមានប្រទេសណាខ្លះ? 
ចំ. ដៃគូពាណិជ្ជកម្មរបស់កូរ៉េខាងត្បូងមានប្រទេសជប៉ុន អាមេរិក និងអាល្លឺម៉ង់។

៣២. តើផលិតផលឧស្សាហកម្មរបស់កូរ៉េខាងជើងមានអ្វីខ្លះ? 
ចំ. ផលិតផលឧស្សាហកម្មរបស់កូរ៉េខាងជើងមានស៊ីម៉ង់ត៍ ផលិតផលគីមី ដែក ដែកថែប គ្រឿងម៉ាស៊ីន និងក្រណាត់។

៣៣. តើកូរ៉េខាងជើងមានធនធានក្រោមដីអ្វីខ្លះ? 
ចំ. កូរ៉េខាងជើងមានធនធានក្រោមដីដូចជា៖
- ធ្យូងថ្ម
- ដែក
- សំណ
- ប្រាក់
- ម៉ាញេស្យូម
- តង់ស្តែន និងស័ង្កសី។