(ជ៥) មេរៀនទី៣៖ (សង្ខេបមេរៀន) គ្រឿងស្រវឹង

ជំពូក៥​  អាល់កុលនិងថ្នាំជកើ

មេរៀនទី៣   គ្រឿងស្រវឹង

សេចក្ដីផ្ដើម

- ស្រាមិនមែនជាគ្រឿងញៀនខុសច្បាប់ទេ ប៉ុន្ដែយើងមិនគួរផឹកស្រាឡើយ។ ស្រាជាវត្ថុរាងដូចជា ស្រាបៀ ស្រាស ស្រាទំពាំងបាយជូរ ដែលផលិតចេញពីផ្លែឈើ ឬគ្រាប់ធញ្ញជាតិ។

១. ស្រាជាគ្រឿងស្រវឹង

- អាល់កុលនិងស្រាខុសគ្នាដោយអាល់សុទ្ធគ្មានពណ៌និងគ្មានរសជាតិទេ។ ចំណែកស្រាមានពណ៌និងរសជាតិផ្សេងៗគ្នា ដោយសារធាតុផ្សំដទែទៀតដែលគេបន្ថែម។

• • • • គ្រឿងស្រវឹងជាសារធាតុធ្វើឱ្យធ្លាក់ទឹកចិត្តមិនមែនសារធាតុដែលបង្កើនកម្លាំងចិត្តដូចការគិតរបស់មនុស្សភាគច្រើននោះទេ។
      • គ្រឿងស្រវឹងប៉ះពាល់ដល់ការប្រមូលអារម្មណ៍និងពន្យឺតរយៈពេលឆ្លើយតបទៅនឹងហេតុការណ៍ចៃដន្យណាមួយ។

២. គ្រឿងស្រវឹង និងរាងកាយ

- គ្រឿងស្រវឹងជ្រាបចូលទៅក្នុង ចរន្តឈាម តាមក្រពះ និងពោះវៀនតូច នៃប្រដាប់រំលាយអាហាររបស់មនុស្ស ។ អាហារដែលមាននៅក្នុងក្រពះ បន្ថយអត្រាជ្រាបចូលនៃគ្រឿងស្រវឹង ប៉ុន្តែមិនកាត់បន្ថយកម្រិតនៃការពុល ឬស្រវឹងទេ។    គ្រឿងស្រវឹងត្រូវបានចែកចាយទៅគ្រប់សរីរាង្គដែលមានជាតិទឹក ប៉ុន្តែមិនជ្រាបចូលទៅក្នុងជាលិកាខ្លាញ់ទេ។ ថ្លើមបំបែកគ្រឿងស្រវឹង90% ឯចំនួននៅសល់តិចតួចត្រូវបានបញ្ចេញចោលតាមទឹកនោម ញើស និងដំណកដង្ហើម ។ ថ្លើមអាចបំបែកសារធាតុពុលប្រហែល3/4 នៃកម្រិតស្តង់ដាក្នុង១ម៉ោង។

- ការងូតទឹកឬហាត់ប្រាណមិនអាចធ្វើឱ្យឆាប់ស្វាងស្រវឹងទេ។ ព្រោះការស្វាងស្រវឹងត្រូវការពេលវេលា។

គ្រឿងស្រវឹងចូលតាមឈាម                  ថ្លើមបំបែកគ្រឿងស្រវឹង90%

៣. ផលប៉ះពាល់រាងកាយ

- ការទទួលទានគ្រឿងស្រវឹងច្រើនប៉ះពាល់ដល់សតិបញ្ញាដូចជា បាត់បង់ការចងចាំ វង្វេងវង្វាន់ អារម្មណ៍ច្របូកច្របល់ …។

- ការទទួលទានស្រាច្រើនឬផឹករយៈពេលយូរអង្វែងអាចប៉ះពាល់ធ្ងន់ធ្ងរដល់រាងកាយដូចជា មហារីកមាត់ បំពង់អាហារ ថ្លើម កើនសម្ពាធឈាម បេះដូងរីក រលាកក្រពះ ដំបៅក្រពះ ឈាមក្នុងក្រពះ រលាកថ្លើម ក្រិនថ្លើម រលាកលំពែង…។

៤.​ ស្រ្តីនិងគ្រឿងស្រវឹង

-តាមការស្រាវជ្រាវ គ្រឿងស្រវឹងផ្តល់ផលប៉ះពាល់ដល់ស្ត្រីខុសពីបុរសដូចជា៖

• • • • ស្ត្រីនឹងមានកំហាប់ជាតិអាល់កុលក្នុងឈាមខ្ពស់ជាងបុរស ។ ពីព្រោះរាងកាយស្ត្រីផ្ទុកជាតិខ្លាញ់ច្រើនជាងនិងជាតិទឹកតិចជាងរាងកាយបុរស។
      • ស្ត្រីងាយនឹងខូចថ្លើម ហើយទទួលរងផលប៉ះពាល់ដល់សុខភាពផ្សេងៗទៀតជាងបុរស ។ ម៉្យាងទៀតស្រ្តីទទួលទានគ្រឿងស្រវឹងច្រើន ប្រឈមមុខនឹងការកើតជំងឺមហារីកដោះ និងរោគស្ត្រី ជាងស្រ្តីមិនទទួលទានគ្រឿងស្រវឹង។
      • តាមរយៈការស្រាវជ្រាវបានបង្ហាញថា ប្រតិកម្មរបស់ស្ត្រីទៅនឹងគ្រឿងស្រវឹងប្រែប្រួលតាមវដ្ដរដូវរបស់ស្រ្តី ដោយសារកម្រិតខុសៗគ្នានៃអរម៉ូន ។ ស្ត្រីដែលប្រើប្រាស់ថ្នាំពន្យារកំណើតត្រូវការពេលវេលាដើម្បីបញ្ចេញជាតិអាល់កុលពីរាងកាយយូរជាងស្ត្រីដែលមិនប្រើប្រាស់ថ្នាំពន្យារកំណើត 
      • ដោយសារមូលហេតុនេះ ទើបអ្នកជំនាញផ្នែកសុខាភិបាលផ្តល់យោបល់ដល់ស្ត្រីឱ្យទទួលទានគ្រឿងស្រវឹងតិចជាងបុរស។
      • ចំពោះស្រ្តីមានផ្ទៃពោះសារធាតុអាល់កុលឆ្លងពីម្ដាយទៅទារកតាមរយៈសុក។
      • គ្រឿងស្រវឹងប៉ះពាល់ដល់ស្ត្រីពេលមានផ្ទៃពោះដូចជា៖ ធ្លាក់ឈាម រលូតកូន ឬកូនកើតមិនគ្រប់ខែ។
      • ម្តាយញៀនគ្រឿងស្រវឹងពេលមានផ្ទៃពោះ ប៉ះពាល់ដល់ទារកកើតមកអាចញៀនដែរ ក្រោយពេលកើតជួនកាលមានមុខមាត់មិនប្រក្រតីនិងពិការផ្នែករាងកាយ និងសតិបញ្ញា។
      • អង្កការសុខភាពពិភពលោកផ្ដល់ដំបូន្មានថា គ្មានការទទួលទានគ្រឿងស្រវឹងដែលមានសុវត្តិភាពទេ ក្នុងអំឡុងពេលមានផ្ទៃពោះ ។ ដើម្បីសុវត្តិភាពគភ៌ ស្រ្តីមាន ផ្ទៃពោះមិនត្រូវទទួលទានគ្រឿងស្រវឹងនោះទេ។ 

៥. វិធីសាស្រ្តផ្តាច់ការញៀនគ្រឿងស្រវឹង

- វិធីផ្តាច់គ្រឿងស្រវឹងមានដូចជា៖

• • • • ការប្រើប្រាស់ឳសថ
      • ការផ្តល់ប្រឹក្សា
      • អន្តរាគមន៍ត្រួសៗ

៥.១​ ការប្រើប្រាស់ឪសថ

• • ឱសថមួយចំនួនអាចកាត់បន្ថយអាការៈ ការញៀនគ្រឿងស្រវឹង ។
  • តែត្រូវចេញវេជ្ជបញ្ជាត្រឹមត្រូវពីគ្រូពេទ្យ ឯកទេស ឬ គ្លីនិកឯកទេស ។
  • ការប្រើប្រាស់ឳសថទទួលបានប្រសិទ្ធភាព ខ្ពស់ដោយគួបផ្សំការតាំងចិត្ត និងផ្តល់ប្រឹក្សាពីអ្នកឯកទេស ។

៥.២ ការផ្តល់ប្រឹក្សា

• • ការប្រឹក្សាផ្តាច់ការញៀនគ្រឿងស្រវឹងត្រូវធ្វើឡើងនៅមន្ទីរពេទ្យ ឬមណ្ឌលព្យាបាលគ្រឿងស្រវឹង ។
  • ការប្រឹក្សាត្រូវធ្វើឡើងដោយមានការណាត់ជួបឱ្យបានទៀតទាត់។

៥.៣ អន្តរាគមន៏ត្រួសៗ

• • ការផ្តល់អន្តរាគមន៍ត្រួសៗ អាចធ្វើឡើងជាការណាត់ជួបដើម្បីសាកសួរព័ត៌មាន និងផ្តល់ឯកសារអប់រំផ្សេងៗអំពីរបៀបកាត់បន្ថយ ឬបញ្ឈប់ការប្រើប្រាស់គ្រឿងស្រវឹង។
  • អ្នកផ្តល់អន្តរាគមន៍ត្រូវតាមដាន និងជួយអន្តរាគមន៍ដល់អ្នកញៀនឱ្យបានទៀតទាត់ ។