(ជ២) មេរៀនទី២៖ (មេរៀនសង្ខេប) មជ្ឈមណ្ឌលប្រសាទ

មេរៀនសង្ខេប

សេចក្ដីផ្ដើម

នៅពេលឆ្លងកាត់ផ្លូវ យើងត្រូវដើរឆ្លងត្រង់កន្លែងមានភ្លើងសញ្ញាចរាចរណ៍។

យើងឈររង់ចាំភ្លើងសញ្ញាពណ៌បៃតងទើបយើងអាចដើរឆ្លងកាត់ផ្លូវបាន។

   តើសកម្មភាពទាំងអស់នេះ(គំហើញភ្លើងពណ៌បៃតង ការឈររង់ចាំ និងការដើរឆ្លងកាត់ផ្លូវ) កើតឡើងជាបន្តបន្ទាប់យ៉ាងដូចម្ដេច?

១. នាទីប្រព័ន្ធប្រសាទ

      តើប្រព័ន្ធប្រសាទមាននាទីអ្វីខ្លះ?

·        
ប្រព័ន្ធប្រសាទមាននាទីត្រួតពិនិត្យ

សកម្មភាពឆន្ទ: (ញាណ)និងសកម្មភាព

អឆន្ទ: (អញាណ) វាក៏មាននាទី

សម្របសម្រួលផ្នែកផ្សេងៗនៃ

សារពាង្គកាយដោយធ្វើឱ្យផ្នែក

ទាំងនោះបំពេញនាទីព្រមៗគ្នា។

·         សកម្មភាពដោយឆន្ទ: (ញាណ)មានការសម្របសម្រួលចលនាសាច់ដុំ ដូចជា ការជិះកង់ ការរាំ ការច្រៀង…។ល។

·         សកម្មភាពដោយអឆន្ទ: (អញាណ)មានការត្រួតពិនិត្យសកម្មភាពរបស់សរីរាង្គនៃសារពាង្គកាយដូចជា ការកន្រ្តាក់នៃបេះដូង ការដកដង្ហើម ការរំលាយអាហារ…។ល។

២. កាយវិភាគវិទ្យាមជ្ឈមណ្ឌលប្រសាទ

      ·       ប្រព័ន្ធប្រសាទមនុស្សចែកជាពីរផ្នែកសំខាន់គឺ

·         មជ្ឈមណ្ឌលប្រសាទ៖ មាននាទីត្រួតពិនិត្យនិងបញ្ជាឱ្យធ្វើសកម្មភាព។

·         និងបរិមណ្ឌលប្រសាទ៖ មាននាទីភ្ជាប់មជ្ឈមណ្ឌលប្រសាទទៅផ្នែកផ្សេងៗនៃសារពាង្គកាយ។

       ·       មជ្ឈមណ្ឌលប្រសាទនេះភ្ជាប់ប្រព័ន្ធទាំងអស់នៃសារពាង្គកាយនិងដឹកនាំសញ្ញាពីប្រព័ន្ធមួយទៅប្រព័ន្ធមួយផ្សេងទៀត។

       ·       មជ្ឈមណ្ឌលប្រសាទចែកចេញជា២ផ្នែកគឺ៖ខួរក្បាល និងខួរឆ្អឹងខ្នង។

២.១ ខួរក្បាល

       ·      ខួរក្បាល ជាសរីរាង្គមួយដែលមានលក្ខណៈស្មុគស្មាញខ្លាំង។

       ·      ខួរក្បាលជាកន្លែងទទួល បកស្រាយ និងបញ្ជាគ្រប់សកម្មភាពផ្សេងៗឱ្យធ្វើចលនា។

       ·      ខួរក្បាល គ្របដណ្ដប់ដោយ ឆ្អឹងលលាដ៍ក្បាល ស្រោមខួរ និង ទឹកខួរ។

       ·      ខួរក្បាលមានបីផ្នែកសំខាន់គឺ ខួរធំ ខួរតូច និងខួរកញ្ចឹងក ។

       ·      ខួរក្បាលកើតឡើងពីកោសិកាប្រសាទរាប់ពាន់លាន(ប្រហែល100ពាន់លាន) ហើយមានផ្ទៃក្រឡាប្រហែល ពី 2000 ទៅ2100 សង់ទីម៉ែត្រ

           ការ៉េ។

       ·      ខួរក្បាលមនុស្សប្រុសមានទម្ងន់ពី 1200ទៅ1350g ចំណែកមនុស្សស្រីមានទម្ងន់ពី 1000 ទៅ1250g។

ក. ខួរធំ

     
ខួរធំជាផ្នែកដែលធំជាងគេនៃខួរក្បាលមាននាទី៖

·      ​​ត្រួតពិនិត្យការគិត ការពិចារណា

·      ស្តុកទុក ទទួល និងបញ្ជូនព័ត៌មាន

      ·       ខួរធំចែកចេញជាពីរចំហៀង ហៅថាអឌ្ឍគោលខួរឆ្វេងនិងស្តាំ។

·      អឌ្ឍគោលខួរឆ្វេងត្រួតពិនិត្យសាច់ដុំនៃសារពាង្គកាយចំហៀងខាងស្តាំ

·      ឯអឌ្ឍគោលខួរស្តាំត្រួតពិនិត្យសកម្មភាពសាច់ដុំនៃសារពាង្គកាយចំហៀងខាងឆ្វេង។

       ·       សំបកខួរមានសភាពជាផ្នត់ៗជាច្រើន មាននាទីខាង សតិ បញ្ញា ប្រឌិតញាណ និងការពិចារណា ដែលអាចបង្កើតឬភ្ញោចការ

           បញ្ចេញអរម៉ូនពីក្រពេញអ៊ីប៉ូភីស។

       ·      ដោយហេតុនេះប្រសិនបើមានរបួសធ្ងន់ធ្ងរនូវខួរក្បាលចំហៀងខាងឆ្វេងនឹងទទួលរងនូវការបាត់បង់សមត្ថភាពផ្នែកនិយាយបើរបួសធ្ងន់ធ្ងរ

        នូវខួរក្បាលចំហៀងខាងស្តាំនឹងមិនអាចចាំមុខមនុស្សដែលគេធ្លាប់ស្គាល់បានទេ។

ខ. ខួរតូច

·      
ខួរតូចស្ថិតនៅផ្នែកខាងក្រោយ ខាងក្រោមខួរធំ។

·       ស្រទាប់ខាងក្រៅរបស់ខួរតូចមានផ្នត់ជ្រៅៗជាច្រើន

ដែលកើតឡើងពីសារធាតុប្រផេះ ឯស្រទាប់ខាងក្នុង

កើតឡើងពីសារធាតុសដូចខួរធំដែរ។

       ·      ខួរតូចមាននាទី៖

·      ត្រួតពិនិត្យចលនាឆន្ទៈទាំងអស់ និងចលនាអឆន្ទៈមួយចំនួន

·      រក្សាលំនឹងក្នុងសារពាង្គកាយ

·      បញ្ជូនអាំងភ្លុចប្រសាទទៅកាន់សំបកខួរធំ ដើម្បីឱ្យសំបកខួរធំជួយកែលំអនិងសម្របសម្រួលចលនារបស់សាច់ដុំក្នុងការធ្វើចលនា ។

       ·      តើខួរតូចត្រួតពិនិត្យចលនាឆន្ទៈបានយ៉ាងដូចម្ដេច?

·      ខួរតូចត្រួតពិនិត្យចលនាឆន្ទៈ គឺនៅពេលសាច់ដុំបញ្ចូនអាំងភ្លុចប្រសាទតាមផ្លូវប្រសាទវិញ្ញាណនាំទៅកាន់ខួរតូច អាំងភ្លុចប្រសាទនេះផ្ដល់ព័ត៌មាន និងទីតាំងនៃការកន្ដ្រាក់របស់សាច់ដុំ បន្ទាប់មកខួរតូចបញ្ជូនអាំងភ្លុចប្រសាទទៅសំបកខួរធំ ដើម្បីឱ្យសំបកខួរធំជួយកែលំអរនិងសម្របសម្រួលក្នុងការធ្វើចលនារបស់សាច់ដុំ។

       ·      ផ្នែកទី២នៃខួរក្បាលជាខួរតូច ដែលសណ្តូកនៅចំពីខាងក្រោមផ្នែកខាងក្រោយនៃខួរធំ។ខួរតូចចែកជាអឌ្ឍគោលខួរពីរ ហើយនៅពីលើខួរ

          តូចមានចង្អូរជ្រៅៗជាច្រើន។ខួរតូចមានទំហំតូចជាងខួរធំយ៉ាង   ច្រើន។ ខួរតូចបញ្ជាចលនាសាច់ដុំឱ្យធ្វើការព្រមគ្នានិងរលូន ជួយសារពាង្គ

          កាយឱ្យមានលំនឹងផងដែរ។

       ·      ការខូចខាតខួរតូចបណ្តាលឱ្យមានចលនាកន្រ្តាក់ៗឬបាត់បង់តុល្យភាព។

       ·      ផ្នែកទាំងពីរនៃប្រព័ន្ធប្រសាទភ្ជាប់គ្នាដោយសារ ខួរកញ្ចឹងក។ ខួរកញ្ចឹងកជាផ្នែកទី៣និងតូចបំផុតរបស់ខួរក្បាល លាតសន្ធឹងចេញពីខួរតូច

          ហើយភ្ជាប់ខួរក្បាលទៅនឹងខួរឆ្អឹងខ្នង។

គ. ខួរកញ្ចឹងក

      ·      ខួរកញ្ជឹងកមានទីតាំងស្ថិតនៅផ្នែកខាងក្រោមខួរធំហើយភ្ជាប់ទៅនឹងខួរឆ្អឹងខ្នង តែនៅខាងមុខខួរតូច។

      ·      ខួរកញ្ជឹងក ផ្នែកខាងក្រៅជាសារធាតុស ហើយផ្នែកខាងក្នុងជាសារធាតុប្រផេះ។

      ·      ខួរកញ្ជឹងក ត្រួតពិនិត្យចលនាអឆន្ទៈមួយចំនួនដូចជា ៖ ចង្វាក់ដង្ហើម ការកន្ត្រាក់បេះដូង សម្ពាធឈាម ការរំលាយអាហារ...ដែលសកម្មភាព

          ទាំងនេះត្រូវបានខួរកញ្ចឹង ក ត្រួតពិនិត្យដោយស្វ័យប្រវត្តិ។

២.២ ខួរឆ្អឹងខ្នង

      ·      ខួរឆ្អឹងខ្នងជាផ្នែកបន្តរបស់ខួរកញ្ចឹងកដែលសន្ធឹងចុះមកខាងក្រោមប្រវែងប្រហែល 42-45Cm។ វាស្ថិតនៅក្នុងប្រហោងនីមួយៗនៃឆ្អឹងកង

          របស់ឆ្អឹងខ្នង។

      ·      ខួរឆ្អឹងខ្នងត្រូវបានការពារដោយសារ ឆ្អឹងខ្នង ស្រោមខួរ និងទឹកខួរ។

      ·      ខួរឆ្អឹងខ្នងកើតឡើងពីបណ្តុំនៃណឺរ៉ូនដែលដឹកនាំអាំងភ្លុចប្រសាទពីគ្រប់ផ្នែកទាំងអស់នៃសារពាង្គកាយទៅកាន់ខួរក្បាលនិងដឹកនាំអាំងភ្លុច

          ប្រសាទពីខួរក្បាលទៅកាន់គ្រប់ផ្នែកទាំងអស់នៃសារពាង្គកាយ។