(ជ៣)មេរៀនទី៤៖ (សង្ខេបមេរៀន) ការងារក្រុម

ជំពូកទី៣               ការរស់នៅក្នុងសហគមន៍

មេរៀនទី៤             ​​​ការងារក្រុម

មេរៀនសង្ខេប

សេចក្ដីផ្ដើម

នៅក្នុងបរិបទនៃពិភពលោកបច្ចុប្បន្ន ការងារជាក្រុមបានក្លាយជាកម្លាំងចលករដ៏សំខាន់សម្រាប់ការអភិវឌ្ឍ និងវឌ្ឍនភាពសង្គម ។ មនុស្សជាតិត្រូវការសហការគ្នា ដើម្បីកសាងពិភពលោកមួយនេះឱ្យកាន់តែប្រសើរឡើង ព្រោះកិច្ចការជាច្រើនមិនអាចសម្រេចបានតែម្នាក់ឯងនោះទេ ។ មេរៀននេះនឹងបកស្រាយស៊ីជម្រៅអំពីនិយមន័យ សារៈសំខាន់ ព្រមទាំងគុណសម្បត្តិរបស់អ្នកដឹកនាំក្រុមប្រកបដោប្រសិទ្ធភាព ដែលជាកត្តាចាំបាច់សម្រាប់សម្រេចបាននូវគោលដៅរួម និងផលប្រយោជន៍ខ្ពស់បំផុត ។

ពាក្យគន្លឹះ

• មូលមតិ: ការយល់ឃើញដូចគ្នាជាឯកភាពគ្នា ។
• គំនិតសំយោគ: សេរីភាពក្នុងការបញ្ចេញមតិយោបល់ និងការយល់ឃើញរបស់ខ្លួន ដើម្បីពិភាក្សាផ្លាស់ប្ដូរយោបល់ ស្វែងរកគំនិតល្អ ឬត្រឹមត្រូវ ។
• អត្ថាធិប្បាយ: ពន្យល់ បកស្រាយឲ្យបានក្បោះក្បាយ ។
• បុព្វបុរស: ដូនតា ឰយុកោ ជនដែលមានកំណើតពីមុនៗ ។
• សុភវិនិច្ឆ័យ:  ការវិនិច្ឆ័យដ៏ល្អ ការសម្រេចចិត្តបានត្រឹមត្រូវ ។
• ឧបសគ្គ: គ្រឿងរារាំង គ្រឿងទាក់ទាម ដំណើរមិនទៅមុខ ។

១. និយមន័យ

ការងារក្រុមគឺជាការរួមគ្នារវាងសមាជិកក្នុងក្រុម ដើម្បីឯកភាពគំនិត និងកម្លាំងសម្រេចកិច្ចការណាមួយឱ្យជោគជ័យ ដែលជាផលប្រយោជន៍រួម ។

២. ការងារក្រុម

ជាទូទៅ ការងារក្រុមតម្រូវឱ្យសមាជិកទាំងអស់មានការស្រុះស្រួលគ្នា រួបរួមគំនិត ព្រោះកិច្ចការធំៗមិនអាចសម្រេចបានតែម្នាក់ឯងឡើយ។ សមាជិកម្នាក់ៗត្រូវបំពេញតួនាទីផ្សេងគ្នា តែមានគោលដៅរួម។ នៅក្នុងឧស្សាហកម្ម និងសំណង់ ការងារក្រុមទាមទារការទទួលខុសត្រូវខ្ពស់ ជំនាញច្បាស់លាស់ និងការសហការគ្នាយ៉ាងស៊ីចង្វាក់ ដើម្បីសម្រេចគោលបំណង និងទាន់ពេលវេលា ។

៣. អ្នកដឹកនាំក្រុម

ការងារក្រុមធំៗត្រូវការអ្នកដឹកនាំម្នាក់ ដើម្បីទទួលខុសត្រូវរួម ក្តាប់ផែនការ និងចង្អុលបង្ហាញទិសដៅការងារប្រកបដោយប្រសិទ្ធភាព។

v  អ្នកដឹកនាំត្រូវមានគោលការណ៍ដូចជា៖

   ·         ការលើកទិសដៅការងារ

   ·         ការកសាងរចនាសម្ព័ន្ធ

   ·         ការដោះស្រាយបញ្ហា

   ·         ការគ្រប់គ្រង និងត្រួតពិនិត្យ

   ·         ការវិភាគចំណុចខ្លាំងខ្សោយ

   ·         ការលើកទឹកចិត្ត

   ·         ការច្នៃប្រឌិត

   ·         ការប្រមូលផ្តុំមតិ

   ·         ការធ្វើជាគំរូ និងការសម្រេចគោលនយោបាយ ។

៤. គុណសម្បត្តិនៃអ្នកដឹកនាំ  

អ្នកដឹកនាំល្អត្រូវមានសុខភាពល្អ សមត្ថភាព (កើតចេញពីការរៀនសូត្រ និងបទពិសោធន៍) និងគុណធម៌។ ក្រៅពីនេះ ត្រូវចេះធ្វើការជាមួយអ្នកដទៃ ស្ដាប់សមាជិកថ្នាក់ក្រោម បង្កើតមេត្រីភាព និងការទុកចិត្ត ។ ពិសេសត្រូវមាន ភាពជឿជាក់លើខ្លួនឯង មានវិន័យ ស្មោះត្រង់ តម្លាភាព ទទួលខុសត្រូវ និងមានសុភវិនិច្ឆ័យល្អក្នុងការដោះស្រាយបញ្ហា ។

៥. សារៈសំខាន់នៃការងារក្រុម

ការងារក្រុមទាមទារការចូលរួម ចែករំលែកសមត្ថភាព និងជំនាញ ដើម្បីផលប្រយោជន៍រួម។ ការងារក្រុមគឺជាថាមពលដ៏ខ្លាំងក្លា ដែលអាចដោះស្រាយបញ្ហាធំៗ ពុះពារឧបសគ្គ និងជាកម្លាំងស្នូលជំរុញការអភិវឌ្ឍសេដ្ឋកិច្ចជាតិ និងការពារបូរណភាពទឹកដី ។