(ជ២)មេរៀនទី៥៖ (មេរៀនសង្ខេប) សាធារណរដ្ឋប្រជាមានិតកម្ពុជា-រដ្ឋកម្ពុជា(១៩៧៩-១៩៩១) ព្រះរាជាណាចក្រកម្ពុជា(១៩៩៣)

ពាក្យគន្លឹះ

·         •     ឧក្រិដ្ឋកម្ម      ៖ ការសម្លាប់យ៉ាងធ្ងន់ធ្ងរ។

·         •        ប្រជាធិបតេយ្យ ៖ លទ្ធិដែលយករាស្រ្តជាធំ។

·         •     រណសិរ្ស        ៖ ក្បាលទ័ព ឬជួរទ័ព។

·         •     ឧត្តរ           ៖ សំដៅទិសខាងជើង។

·         •     មជ្ឈឹម           ៖ កណ្តាល។

·         •     កុបកម្ម        ៖ ការបះបោរប្រឆាំងដោយប្រើហិង្សា(អាវុធ)។

·         •     អព្យាក្រឹត      ៖ កណ្តាល។

·         •     អនុម័ត        ៖ ការយល់ព្រម។

·         •     បូរណភាព      ៖ ភាពពេញលេញ។

·         •     មហាសន្និបាត ៖ ការជួបជុំដ៏ច្រើន។

១. ការបង្កើតរណសិរ្ស និងជ័យជំនះ ៧  ខែ មករា ឆ្នាំ ១៩៧៩

១.១. ការបង្កើតរណសិរ្សសង្រ្គោះជាតិកម្ពុជា

v  មូលហេតុនៃការបង្កើតរណសិរ្សសាមគ្គីសង្រ្គោះជាតិកម្ពុជា ៖

·         •     ពួកប៉ុលពតកាប់សម្លាប់ និងបង្អត់អាហារប្រជាជនកម្ពុជា

·         •     សម្លាប់អ្នកចេះដឹង (បញ្ញាវន្ត)

·         •     លុបបំបាត់សាសនា ប្រពៃណី ជំនឿ ទំនៀមទម្លាប់

·         •     យកប្រទេសកម្ពុជាជាវាលពិឃាត និងផ្តាច់ទំនាក់ទំនងអន្តរជាតិ

·         •     កម្ពុជាក្លាយជាកូនអុករបស់ចិន ។

+ តើរបបឧក្រិដ្ឋកម្មប្រល័យពូជសាសន៍ ប៉ុល ពត បានធ្វើឱ្យប្រទេសកម្ពុជាមានស្ថានភាពដូចម្តេច?

- របបឧក្រិដ្ឋកម្មប្រល័យពូជសាសន៍ ប៉ុល ពត បានធ្វើឱ្យប្រទេសកម្ពុជាធ្លាក់ដល់ក្រោមសូន្យ និងបានធ្វើឱ្យ  

 ប្រជាជនខ្មែរគ្មានទំនុកចិត្ត បាក់ស្បាត តក់ស្លុត រស់ទាំងអស់សង្ឃឹម ។

+តើរបបកម្ពុជាប្រជាធិបតេយ្យបានបង្ខំប្រជាជនឱ្យធ្វើការដូចម្តេច?

- របបកម្ពុជាប្រជាធិបតេយ្យបានបង្ខំប្រជាជនឱ្យធ្វើការងារជាទម្ងន់ បង្អត់អាហារ គ្មានថ្នាំព្យាបាល ខ្វះសម្លៀកបំពាក់គ្មានជម្រក រស់នៅសមរម្យ បំបិទសិទ្ធិសេរីភាពគ្រប់យ៉ាង ពិសេសពួកឃាតករអាវខ្មៅបានសម្លាប់ប្រជាជនកម្ពុជាដោយគ្មានកំហុស ។

+ដោយឃើញបែបនេះ តើកម្មាភិបាលខ្មែរក្រហមមួយចំនួនចេញមុខប្រឆាំងដែរ ឬទេ? តើកម្មាភិបាលខ្មែរក្រហមណាខ្លះ ដែលពួកខ្មែរក្រហមបានសម្លាប់នៅឆ្នាំ១៩៧៦ ?

- ដោយឃើញអំពើព្រៃផ្សៃបែបនេះហើយ កម្មាភិបាលខ្មែរក្រហម មួយចំនួនបានចេញមុខប្រឆាំងប៉ុន្តែត្រូវមេដឹកនាំខ្មែរក្រហមសម្លាប់ដូចជា លោក ហ៊ូ នឹម សម្លាប់នៅឆ្នាំ១៩៧៦ លោក កុយ ធួន លេខាបក្សភូមិភាគឧត្តរ សម្លាប់នៅឆ្នាំ១៩៧៦ ។ល។

+តើប្រជាជនកម្ពុជាបានក្រោកឈរឡើងប្រឆាំងនឹងប៉ុល ពតដែររឺទេ? នៅឆ្នាំណា? ខេត្តណាខ្លះ ?

- នៅឆ្នាំ១៩៧៧ ប្រជាជនខេត្តសៀមរាប បាត់ដំបង កំពង់ធំ មណ្ឌលគិរី កំពង់ឆ្នាំង និងចម្ការហ្លួងបានក្រោកឡើងបង្កចលនាប្រឆាំងនឹងខ្មែរក្រហម ។

+ តើនៅឆ្នាំ១៩៧៨ លោកហេង សំរិនជាមេបញ្ជាការកងពលលេខប៉ុន្មាន?

- នៅឆ្នាំ១៩៧៨ លោកហេង សំរិនជាមេបញ្ជាការកងពលលេខ៤ (ភូមិភាគបូព៌ា) បានដឹកនាំកុបកម្មមួយប្រឆាំងនឹងខ្មែរក្រហម ។

+ តើរណសិរ្សសាមគ្គីសង្រ្គោះជាតិកម្ពុជាបានបង្កើតឡើងនៅថ្ងៃខែឆ្នាំណា?

- រណសិរ្សសាមគ្គីសង្រ្គោះជាតិកម្ពុជាបានបង្កើតឡើងនៅថ្ងៃទី ២ ធ្នូ ១៩៧៨ ។

+តើគណៈកម្មាធិការមជ្ឈិមរណសិរ្សមានសមាជិកប៉ុន្មានរូប?  អ្នកណាជាប្រធាន ?

- គណៈកម្មាធិការមជ្ឈិមរណសិរ្សមានសមាជិក១៤រូប 

- លោកហេង សំរិន ជាប្រធាន ។

+តើមហាសន្និបាតបានអនុម័តកម្មវិធីនយោបាយដូចម្តេចខ្លះ?

- មហាសន្និបាតបានអនុម័តកម្មវិធីនយោបាយដូចតទៅ៖

•  ផ្តួលរំលំរបបប្រល័យពូជសាសន៍ខ្មែរក្រហម រំដោះប្រជាជនទូទាំងប្រទេសឱ្យរួចផុតពីរណ្តៅមរណៈ

• គោរពឆន្ទៈនិងគោលបំណងរបស់ប្រជាជនកម្ពុជា

• កសាងប្រទេសកម្ពុជាប្រកបដោយសន្តិភាព ឯករាជ្យ ប្រជាធិបតេយ្យ អព្យាក្រឹត បូរណភាព ទឹកដី និងសម្បូររុងរឿង ។

១.២.  ជ័យជំនះថ្ងៃ ៧ មករា ១៩៧៩

+តើកងទ័ពរណសិរ្ស និងកងទ័ពវៀតណាមបានរំដោះខេត្តណាខ្លះនៃប្រទេសកម្ពុជា? ថ្ងៃខែឆ្នាំណា ?

កងទ័ពរណសិរ្ស និងកងទ័ពវៀតណាមបានរំដោះខេត្តនៃប្រទេសកម្ពុជាដូចជា៖

-  ថ្ងៃទី ៣០ ធ្នូ ១៩៧៨ រំដោះបានលំផាត់ វឺនសៃ ទន្លេបិទ និងក្រចេះ

- ថ្ងៃទី ៣-៤ មករា ១៩៧៩ រំដោះបានខេត្តស្វាយរៀង និងស្ទឹងត្រែង

- ថ្ងៃទី ៥-៦ មករា ១៩៧៩ រំដោះបានអ្នកលឿង និងទីរួមខេត្តកំពង់ចាម

- ថ្ងៃទី ៧ មករា ១៩៧៩ រំដោះបានរាជធានីភ្នំពេញ(ម៉ោង១២:៣០នាទី) តាកែវ

  និងក្រុងកំពង់សោម (ព្រះសីហនុ)

- ថ្ងៃទី ១០-១១ មករា ១៩៧៩ រំដោះបានខេត្តសៀមរាប និងបាត់ដំបង

- ថ្ងៃទី ១៣-១៤-១៧ មករា ១៩៧៩ រំដោះបានខេត្តពោធិ៍សាត់ កោះកុង...។ល។

+តើមហាសន្និបាតជាតិលើកទី៣  ប្រារព្ធធ្វើឡើងនៅថ្ងៃទីខែឆ្នាំណា ?

- មហាសន្និបាតជាតិលើកទី៣  ប្រារព្ធធ្វើឡើងនៅថ្ងៃទី៥-៨  មករា ១៩៧៩ ។

+តើរណសិរ្សបានអនុម័តពិធីដូចម្តេច ?

- រណសិរ្សបានអនុម័តកម្មវិធីសង្រ្គោះជាតិ និងរំដោះប្រទេសកម្ពុជាឱ្យបានទាំងស្រុង ។

+តើកងទ័ពរណសិរ្ស និងកងទ័ពវៀតណាមរំដោះបានរាជធានីភ្នំពេញ និងខេត្តមួយចំនួនធំទៀត

  នៅថ្ងៃខែឆ្នាំណា  ? ម៉ោងប៉ុន្មាន ?

- កងទ័ពរណសិរ្សនិងកងទ័ពវៀតណាមរំដោះបានរាជធានីភ្នំពេញ

  និងខេត្តមួយចំនួនធំទៀតនៅថ្ងៃទី៧ មករា ១៩៧៩

  ម៉ោង១២:៣០នាទី ។

២. ការកសាងសង្គមជាតិឡើងវិញ

+តើក្រោយថ្ងៃរំដោះ ៧ មករា ១៩៧៩ ប្រជាជនដែលរួចផុតពីរបបខ្មែរក្រហមបាននាំគ្នាវិលទៅណា?

- ក្រោយថ្ងៃរំដោះ ៧ មករា ១៩៧៩ ប្រជាជនដែលរួចផុតពីរបបខ្មែរក្រហមបាននាំគ្នាវិលទៅរកស្រុកកំណើតរៀងៗខ្លួន ។

+តើប្រជាជនដែលមិនបានវិលទៅស្រុកកំណើត បាននាំគ្នាទៅទីណា ?

- ប្រជាជនដែលមិនបានវិលទៅស្រុកកំណើត បាននាំគ្នាទៅជាយដែនខ្មែរថៃ និងខ្លះទៅដល់ប្រទេសទី៣មានអាមេរិក បារាំង អូស្រ្តាលីជាដើម ។

+តើស្ថានភាពប្រជាជនកម្ពុជាក្រោយរំដោះ៧ មករា១៩៧៩ មានសភាពដូចម្តេច?

- ស្ថានភាពប្រជាជនកម្ពុជាក្រោយរំដោះ៧ មករា១៩៧៩ មានសភាពក្រលំបាកតោកយ៉ាក និរាសព្រាត់ប្រាស គ្រួសារ បន្សល់ក្មេងកំព្រា ស្រ្តីមេម៉ាយនិងចាស់ជរា គ្មានផ្ទះសម្បែង បាក់កម្លាំង គ្មានគោក្របី នង្គ័ល រនាស់...សម្រាប់ធ្វើស្រែចម្ការ ។

២.១. ក្រុមសាមគ្គីបង្កបង្កើនផល

+តើក្រុមសាមគ្គីបង្កបង្កើនផលត្រូវបានបង្កើតនៅឆ្នាំណា? មានប៉ុន្មានគ្រួសារ ?  ដើម្បីអ្វី?

-ក្រុមសាមគ្គីបង្កបង្កើនផលត្រូវបានបង្កើតនៅឆ្នាំ១៩៧៩មានសមាជិកចាប់ពី ១០គ្រួសារឡើងទៅ បង្កើតឡើងដើម្បីជួយកម្លាំងដល់ស្រ្តីមេម៉ាយ ។

+តើក្រុមសាមគ្គីបង្កបង្កើនផលចែកជាកម្លាំងពលកម្មប៉ុន្មានក្រុម? អ្វីខ្លះ? ដើម្បីអ្វី?

- ក្រុមសាមគ្គីបង្កបង្កើនផលចែកជា៣ក្រុម គឺ

• កម្លាំងទី១ ឬកម្លាំងពេញ មានបុរស ស្រ្តី យុវជន និង អ្នកកាន់នង្គ័ល

• កម្លាំងទី២ ឬកម្លាំងមធ្យម មានកុមារជំទង់និងគោ ក្របី  
• កម្លាំងទី៣ ឬកម្លាំងខ្សោយ មានចាស់ជរា និងកុមារតូចៗ  

 ដើម្បីចែកផលដែលផលិតបាន ។

+ក្រៅពីក្រុមសាមគ្គីបង្កបង្កើនផល តើមានផ្សារលក់ដូរ ឬទេ? គេចាយអ្វី ?

-ក្រៅពីក្រុមសាមគ្គីបង្កបង្កើនផល មានផ្សារលក់ដូរទ្រង់ទ្រង់ទ្រាយមិនធំទេ ដំបូងគេចាយអង្ករ

 ក្រោយមកគេចាយលុយរៀល (សេន កាក់ លុយដុង លុយបាត និងមាស...) ១រៀលរហូតដល់៥០រៀល ។

+តើក្រុមសាមគ្គីបង្កបង្កើនផលត្រូវបានបញ្ចប់នៅពេល ណា? ឆ្នាំណា ? ព្រោះអ្វី ?

- ក្រុមសាមគ្គីបង្កបង្កើនផលត្រូវបានបញ្ចប់នៅពេលរដ្ឋបានបែងចែកដីស្រែតាមកម្លាំងពលកម្ម និងតាមសមាជិកគ្រួសារនៅឆ្នាំ១៩៨២ រីឯខេត្តខ្លះបញ្ចប់រហូតដល់ឆ្នាំ១៩៨៥ ឯណោះ ។ ព្រោះរដ្ឋបានបង្កើត

ផ្សារលក់ដូរ និងប្រាក់ចាយ ។

២.២. ទិន្នផលស្រូវប្រចាំឆ្នាំ

+តើទិន្នផលស្រូវនៅឆ្នាំ១៩៨៨កើនពីប៉ុន្មានតោនទៅប៉ុន្មានតោន?

ចំ. ទិន្នផលស្រូវនៅឆ្នាំ១៩៨៨កើនពី២ ៧០០ ០០០តោន ទៅ ៣ ០០០ ០០០តោន ។

២.៣ រចនាសម្ព័ន្ធគ្រប់គ្រង ១៩៧៩-១៩៨១

+ចូររៀបរាប់ពីរចនាសម្ព័ន្ធគ្រប់គ្រងរដ្ឋឆ្នាំ ១៩៧៩-១៩៨១ ។

រចនាសម្ព័ន្ធគ្រប់គ្រងរដ្ឋឆ្នាំ ១៩៧៩-១៩៨១ដូចជា៖

-  សមមិត្តហេង សំរិនជាប្រធានរដ្ឋ ឬប្រមុខរដ្ឋ និងជាប្រធានក្រុមប្រឹក្សាប្រជាជនបដិវត្តន៍កម្ពុជា

-  សមមិត្តប៉ែន សុវណ្ណ រៀននៅវៀតណាម១៩៥៤អនុប្រធានក្រុមប្រឹក្សាប្រជាជនបដិវត្តន៍កម្ពុជា

    និងជារដ្ឋមន្រ្តីក្រសួងការពារជាតិ (១៩៧៩-១៩៨១) និងជានាយករដ្ឋមន្រ្តី   

-  សមមិត្ត ជា ស៊ីម ជារដ្ឋមន្រ្តីក្រសួងមហាផ្ទៃ

-  សមមិត្ត ហ៊ុន សែន ជារដ្ឋមន្រ្តីក្រសួងការពារជាតិ

-  សមមិត្តកែវ ចិន្តា ជារដ្ឋមន្រ្តីឃោសនាការ ព័ត៌មាននិងវប្បធម៌

-  សមមិត្តចាន់ វ៉ែន ជារដ្ឋមន្រ្តីក្រសួងអប់រំ

-  សមមិត្ត ចាន់ ស៊ី (រៀននៅវៀតណាម១៩៥៤) ជានាយករដ្ឋមន្រ្តីក្រោយចាប់ខ្លួនប៉ែន សុវណ្ណ ។

២.៤. អង្គការរដ្ឋសំខាន់ៗ

+តើអង្គការរដ្ឋសំខាន់ៗរបស់សាធារណរដ្ឋប្រជាមានិតកម្ពុជាមានអ្វីខ្លះ?

អង្គការរដ្ឋសំខាន់ៗរបស់សាធារណរដ្ឋប្រជាមានិតកម្ពុជាមានដូចជា ៖

·         •  គណបក្សប្រជាជនបដិវត្តន៍កម្ពុជា

·         •  ក្រុមប្រឹក្សាប្រជាជនបដិវត្តន៍កម្ពុជា

·         •  ក្រុមប្រឹក្សារដ្ឋ

·         •  សភាជាតិ ។

+តើរដ្ឋកម្ពុជាបានបង្កើតឡើងនៅឆ្នាំណា? ហេតុអ្វី ?

- រដ្ឋកម្ពុជាបានបង្កើតឡើងនៅឆ្នាំ១៩៨៩ ព្រោះនយោបាយបង្រួបបង្រួមជាតិ ។

+តើថ្ងៃទី២៩-៣០ មេសា ១៩៨៩ សភាបានបើកសម័យ ប្រជុំវិសាមញ្ញមួយដើម្បីអ្វីខ្លះ?

- ចាប់ពីថ្ងៃទី ២៩-៣០ មេសា ១៩៨៩ សភាបានបើកសម័យប្រជុំវិសាមញ្ញមួយដើម្បីធ្វើកំណែ

 ទម្រង់រដ្ឋធម្មនុញ្ញថ្មី និងប្តូរឈ្មោះពីសាធារណរដ្ឋប្រជាមានិតកម្ពុជាមកជា «រដ្ឋកម្ពុជា» រួមទាំងប្តូរទង់ជាតិ

 ភ្លេងជាតិ រដ្ឋធម្មនុញ្ញ ច្បាប់ប្រហារជីវិត ការពារកម្មសិទ្ធិឯកជន ការបង្កើតទីផ្សារសេរី និងទទួលស្គាល់ព្រះពុទ្ធសាសនាជាសាសនារបស់រដ្ឋ ។

៣. នយោបាយបង្រួបបង្រួមជាតិ

+តើមេដឹកនាំធំៗ និងកងទ័ពកម្ពុជាប្រជាធិបតេយ្យបាន ភៀសខ្លួនទៅណា 

  ក្រោយរំដោះប្រទេសជាតិចេញពីរបបប្រល័យពូជសាសន៍ខ្មែរក្រហម?

- ក្រោយរំដោះប្រទេសជាតិចេញពីរបបប្រល័យពូជសាសន៍ខ្មែរក្រហមមេដឹកនាំធំៗ និង កងទ័ពកម្ពុជាប្រជាធិបតេយ្យបានភៀសខ្លួនទៅបង្កសង្រ្គាមនៅតាមព្រំដែនកម្ពុជា-ថៃ ។

+តើអង្គការសហប្រជាជាតិបានប្រគល់អាសនៈឱ្យទៅក្រុមណាខ្លះ?

- អង្គការសហប្រជាជាតិបានប្រគល់អាសនៈឱ្យពួកខ្មែរក្រហម និងសម្ព័ន្ធត្រីភាគីរបស់គេដែលដឹកនាំដោយសម្តេចនរោត្តមសីហនុ ។

+ តើក្រុមសម្ព័ន្ធត្រីភាគីមានការឧបត្ថម្ភគាំទ្រពីណាខ្លះ?

- ក្រុមសម្ព័ន្ធត្រីភាគីមានការឧបត្ថម្ភគាំទ្រពីអង្គការសហប្រជាជាតិ សហរដ្ឋអាមេរិក ចិន ថៃ...។

+តើប្រទេសបារាំងបានរៀបចំគម្រោងការជួបចរចារវាងសម្តេចនរោត្តមសីហនុ និងលោកហ៊ុនសែន

  នៅពេលណា ? បានសម្រេចដែរឬទេ ? ព្រោះអ្វី ?

- ប្រទេសបារាំងបានរៀបចំគម្រោងការជួបចរចារវាងសម្តេចនរោត្តមសីហនុ និងលោកហ៊ុនសែន

    នៅខែ វិច្ឆិកា ឆ្នាំ១៩៨៤ ។ ប៉ុន្តែគម្រោងការនេះ ត្រូវអាក់ខានទៅវិញ ដោយសារចិន និង ខ្មែរក្រហម

   មិនយល់ព្រម ។

+ តើនៅថ្ងៃខែឆ្នាំណាដែលរដ្ឋមន្រ្តីការបរទេសឥណ្ឌូណេស៊ីបានធ្វើទស្សនកិច្ចជាផ្លូវការនៅ

 ប្រទេសវៀតណាម ?

- នៅថ្ងៃទី ២៧ កក្កដា ១៩៨៧ រដ្ឋមន្រ្តីការបរទេសឥណ្ឌូណេស៊ីបានធ្វើទស្សនកិច្ចជាផ្លូវការ

  នៅប្រទេសវៀតណាម ។

+តើរដ្ឋមន្រ្តីការបរទេសឥណ្ឌូណេស៊ីបានធ្វើ

ទស្សនកិច្ចជាផ្លូវការនៅប្រទេសវៀតណាមដើម្បីអ្វី ?

+ រដ្ឋមន្រ្តីការបរទេសឥណ្ឌូណេស៊ីបានធ្វើទស្សនកិច្ចជាផ្លូវការនៅប្រទេសវៀតណាមដើម្បីពិភាក្សាគ្នាពីរូបមន្តនៃការជួបគ្នារវាងគូវិវាទខ្មែរ ។

+តើការពិភាក្សាគ្នាពីរូបមន្តនៃការជួបគ្នារវាងគូវិវាទខ្មែរ

  ទាំងអស់មានប៉ុន្មានដំណាក់កាល  ?

-ការពិភាក្សាគ្នាពីរូបមន្តនៃការជួបគ្នារវាងគូវិវាទខ្មែរទាំងអស់មាន២ដំណាក់កាល គឺ ៖

•  ការជួបគ្នារវាងភាគីខ្មែរ និងខ្មែរ

•  ការជួបគ្នារវាងភាគីខ្មែរ និងប្រទេសពាក់ព័ន្ធ ។

+តើការចរចាគ្នារវាងសម្តេចសីហនុ និងលោកហ៊ុន សែន

  ធ្វើឡើងប៉ុន្មានលើក ? នៅថ្ងៃខែឆ្នាំណា ? នៅឯណា ?

-ការចរចាគ្នារវាងសម្តេចសីហនុ និងលោកហ៊ុន សែន ធ្វើឡើង២លើកគឺ ៖

·         •  ជំនួបទី១ : នៅថ្ងៃទី​ ​២ ខែ​​​​​​​​​ ធ្នូ ឆ្នាំ ១៩៨៧ នៅទីក្រុងហ្វ៊ែអង់តាដឺន័រ (បារាំង)

·         •  ជំនួបទី២ : នៅថ្ងៃទី ២១-២២ ខែ មករា ឆ្នាំ ១៩៨៨ នាប្រទេសបារាំង ។

+តើការណាត់ជួបចរចាណាដែលមិនបានសម្រេច? ព្រោះអ្វី ?

- ការណាត់ជួបទី៣ ទី៤ ទី៥ មិនបានសម្រេច ព្រោះសម្តេចសីហនុលុបចោល ។

+តើសន្និសីទទីក្រុងប៉ារីសបានប្រារព្ធធ្វើឡើងនៅពេលណា?

- សន្និសីទទីក្រុងប៉ារីសបានប្រារព្ធធ្វើឡើងនៅថ្ងៃទី២៣ ខែតុលា ឆ្នាំ១៩៩១ ។

+ តើអ្នកតំណាងនៃការចរចារកសន្តិភាពឱ្យកម្ពុជាមានអ្នកណាខ្លះ?

ចំ. អ្នកតំណាងនៃការចរចារកសន្តិភាពឱ្យកម្ពុជាមាន

·         •  សម្តេចនរោត្តមសីហនុ 

·         •  និង​​ លោកហ៊ុន សែន ។

+តើធម្មនុញ្ញនៃព្រះរាជាណាចក្រកម្ពុជាបានប្រកាសឱ្យប្រើប្រាស់នៅថ្ងៃខែឆ្នាំណា?

- ធម្មនុញ្ញនៃព្រះរាជាណាចក្រកម្ពុជាបានប្រកាសឱ្យប្រើប្រាស់នៅថ្ងៃទី ២៤ កញ្ញា ១៩៩៣ ។

+តើប្រទេសកម្ពុជាប្តូរឈ្មោះជាអ្វី? តើព្រះបាទនរោត្តមសីហនុឡើងគ្រងរាជ្យលើកទី២ នៅថ្ងៃខែឆ្នាំណា ?

- ប្រទេសកម្ពុជាប្តូរឈ្មោះថា « ព្រះរាជាណាចក្រកម្ពុជា »ព្រះបាទនរោត្តមសីហនុឡើងគ្រងរាជ្យលើកទី២ នៅថ្ងៃទី ២៤ កញ្ញា ១៩៩៣ ។