(ជ១) មេរៀនទី២៖ (មេរៀនសង្ខេប) ភោគទ្រព្យទេសចរណ៍ធម្មជាតិនៅកម្ពុជា

ជំពូកទី១   ប្រទេសកម្ពុជា

មេរៀនទី២      ភោគទ្រព្យទេសចរណ៍ធម្មជាតិនៅកម្ពុជា

ពាក្យគន្លឹះ

- ទេសចរណ៍ : ជាកម្រងសកម្មភាពទាក់ទងនឹងការផ្លាស់ប្តូរទីកន្លែងនៃទេសចរក្នុងការធ្វើដំណើរកម្សាន្ត ។

- ទេសចរ : មនុស្សដែលផ្លាស់ទីកន្លែង ធ្វើដំណើរដើម្បីសប្បាយ ។

- រាងជាដោម : កំពូលប្រាសាទ ស្រដៀងនឹងរាងដោក ខ្ពស់ត្រដែត ក្រឡេកទៅឃើញដោមប្រាសាទស្អាតខ្ពស់ ត្រដឹម មើលពីចម្ងាយឃើញសន្លឹមស្រងាត់ក្នុងមេឃា ។

- រមណីយដ្ឋាន : កន្លែងដែលគួរជាទីសប្បាយរីករាយ ។

- ឧទ្យានជាតិ : តំបន់ធម្មជាតិ និងមានទស្សនីយភាពប្រកបដោយសារៈសំខាន់ ដោយសារតម្លៃផ្នែកវិទ្យាសាស្ត្រ អប់រំ និងផ្នែកសម្រាកកម្សាន្ត ។

សេចក្ដីផ្ដើម

          ស្ថានភាពភូមិសាស្ត្រកម្ពុជារួមមាន ទីតាំងភូមិសាស្ត្រ សណ្ឋានដី អាកាសធាតុ ផ្លូវទឹក បានបង្កើតឱ្យមានតំបន់ទេសភាពប្លែកៗដែលជាកន្លែងទេសចរណ៍ធម្មជាតិ និងជាប្រភពចំណូលថវិកាជាតិមួយដ៏សំខាន់។

១. រមណីយដ្ឋានធម្មជាតិនៅកម្ពុជា

នៅប្រទេសកម្ពុជា គ្រប់ខេត្តក្រុងទាំងអស់សុទ្ធតែមានរមណីយដ្ឋានផ្ទាល់របស់ខ្លួន គ្រាន់តែកន្លែងខ្លះមានតិច ហើយ កន្លែងខ្លះទៀតមានច្រើន ។ រមណីយដ្ឋានដែលកម្ពុជាមានគឺ តំបន់មាត់សមុទ្រ តំបន់ខ្ពង់រាប តំបន់ភ្នំ និងតំបន់វាលរាប ។

តំបន់មាត់សមុទ្រមានខេត្តកែប កំពត ក្រុងព្រះសីហនុ និងខេត្តកោះកុង ដែលមានរមណីយដ្ឋានកែប រមណីយដ្ឋានទឹកឈូ ភ្នំបូកគោ រមណីយដ្ឋានឆ្នេរអូរឈើទាល សុខា ក្បាលឆាយ និងរមណីយដ្ឋានចាំយាម ទឹកធ្លាក់តាតៃ ។

តំបន់ភ្នំនិងខ្ពង់រាបមានខេត្តកំពង់ស្ពឺ មណ្ឌលគីរី រតនគីរី ក្រចេះ ស្ទឹងត្រែង និងព្រះវិហារ ដែលមានរមណីយដ្ឋាន អំពែភ្នំ គិរីរម្យ ទឹកធ្លាក់ប៊ូស្រា ទឹកធ្លាក់សែនមនោរម្យ បឹងយក្សឡោម ទឹកធ្លាក់កាចាញ ទឹកធ្លាក់ចាអ៊ុង ភ្នំសំបុក ទឹកជួរ សម្បូណ៌ កាំពី អូរពងមាន់ និងកោះខ្សាច់ រមណីយដ្ឋានប្រាសាទព្រះវិហារ...។

តំបន់បឹងទន្លេសាបមានខេត្តសៀមរាប កំពង់ធំ កំពង់ឆ្នាំង ពោធិ៍សាត់ បាត់ដំបង ប៉ៃលិន ឧត្តរមានជ័យ និង បន្ទាយមានជ័យ។ ខេត្តទាំងនេះសម្បូរទៅដោយរមណីយដ្ឋានវប្បធម៌ប្រវត្តិសាស្ត្រ ច្រើនជាងរមណីយដ្ឋានធម្មជាតិ ។ ដូចជា ប្រាសាទអង្គរវត្ត បាយ័ន បន្ទាយស្រី ភ្នំគូលែន ។ ក្រៅពីនេះ មានរមណីយដ្ឋានភ្នំជញ្ជាំង ប្រាសាទបន្ទាយឆ្មារ អាងទឹកកងវ៉ា អាងត្រពាំងបារាយណ៍ ប្រាសាទបាណន់ ភ្នំសំពៅ ភ្នំយ៉ាត ភ្នំបាក់ត្រា ភ្នំសន្ទូច ភ្នំសន្ទុក....។

តំបន់វាលរាបនៃខេត្តកណ្តាល កំពង់ចាម តាកែវ ព្រៃវែង ស្វាយរៀង និងរាជធានីភ្នំពេញ ក៏សម្បូររមណីយដ្ឋានទេសចរណ៍ដែរ ដូចជា ភ្នំប្រសិទ្ធិ៍ ភ្នំប្រុសភ្នំស្រី ភ្នំដា ភ្នំបាយ៉ង់ ភ្នំជីសូរ ភ្នំតាម៉ៅ បាភ្នំ ភ្នំដូនពេញ ព្រះបរមរាជវាំង សារមន្ទីរជាតិ...។

 សង្កេតរូបភាព៖ តំបន់សមុទ្រ ខេត្តកែប កំពត ព្រះសីហនុ និងកោះកុង

សង្កេតរូបភាព៖ តំបន់ភ្នំនិងខ្ពង់រាប ខេត្តរតនគិរី មណ្ឌលគិរី ក្រចេះ ស្ទឹងត្រែង និងព្រះវិហារ

សង្កេតរូបភាព៖ តំបន់ទន្លេសាប មានខេត្តកំពង់ឆ្នាំ កំពង់ធំ សៀមរាប ពោធិ៍សាត់ បាត់ដំបង ឧត្ដរមានជ័យ ប៉ៃលិន និងបន្ទាយមានជ័យ

 សង្កេតរូបភាព៖ តំបន់វាលរាប ខេត្តកណ្ដាល តាកែវ កំពង់ចាម ភ្នំពេញ...។

២. កិច្ចអភិវឌ្ឍ និងផលប៉ះពាល់

គ្រប់រមណីយដ្ឋានទាំងអស់ គឺទាមទារឱ្យមានការរៀបចំសម្រាប់បម្រើការលេងកម្សាន្តរបស់ភ្ញៀវ និងការទាក់ទាញភ្ញៀវផងដែរ ។ សេវាបម្រើភ្ញៀវទាំងនោះមានការថែរក្សាអនាម័យ សុវត្ថិភាព របៀបរៀបរយ សណ្តាប់ធ្នាប់ ភាពស្អាតស្អំ ការធ្វើដំណើរ ការហូបចុក ការស្នាក់នៅ ប្រកបដោយផាសុកភាព និងភាពស្អាតស្អំ ។ ការធ្វើដំណើរ តម្រូវឱ្យមានមធ្យោបាយដឹកជញ្ជូនល្អដូចជា ផ្លូវថ្នល់ និងរថយន្ត ... ។ ការហូបចុក តម្រូវឱ្យ សាងសង់អាហារដ្ឋានស្អាតប្រណីតៗ នៅទីជិតៗឬក្បែររមណីយដ្ឋាន រួមទាំងសេវាបម្រើមុខម្ហូប អាហារជូនភ្ញៀវបានរហ័សទាន់ពេល និងតម្លៃសមស្របផង។ ការស្នាក់នៅរបស់ភ្ញៀវក៏ត្រូវយកចិត្តទុកដាក់ឱ្យបានល្អដែរ ពោលគឺឱ្យភ្ញៀវស្នាក់នៅបានស្រួលគ្មានក្តីបារម្ភ។

ទន្ទឹមនឹងនេះ កិច្ចអភិវឌ្ឍទាំងនោះតែងនាំមកនូវផលប៉ះពាល់ បើមិនច្រើនក៏តិចតួចដែរ ដោយចៀសមិនផុតដូចជា ការបាត់បង់ព្រៃឈើដោយការកាប់បំផ្លាញព្រៃឈើក្នុងព្រៃបម្រុងទុកដោយការឈូសឆាយ ធ្វើផ្លូវថ្នល់ទៅកាន់ទីរមណីយដ្ឋាន សង់អាហារដ្ឋាន កន្លែងទុកដាក់យានជំនិះ បន្ទប់ទឹក សាធារណៈ... ។ ការដឹកជញ្ជូនភ្ញៀវតាមយានយន្ត ដើរដោយចំហេះប្រេងសាំង ប្រេងម៉ាស៊ូត រួមចំណែកបង្កើនជាតិពុលក្នុងបរិយាកាស ។ បញ្ហាមួយទៀតគឺកាកសំណល់ដែលភ្ញៀវបោះបង់ចោល បើគ្មានកន្លែងទុកដាក់ត្រឹមត្រូវ នាំឱ្យមានភាពកខ្វក់រមណីយដ្ឋានបាត់បង់សោភណភាព ។

 សង្កេតរូបភាព៖ ការចោលសំរាមនៅតំបន់ទេសចរណ៍ និងការឈូសឆាយផ្លូវ

៣. យុទ្ធសាស្ត្រនៃការអភិវឌ្ឍភោគទ្រពទេសចរណ៍ធម្មជាតិ

          ដើម្បីរក្សានិរន្តរភាពនៃការអភិវឌ្ឍផ្នែកភោគទ្រព្យទេសចរណ៍ធម្មជាតិរបស់ប្រទេសយើងកាតព្វកិច្ចរបស់ប្រជាពលរដ្ឋគ្រប់រូប ។ ដូច្នេះហើយយើងម្នាក់ៗ ត្រូវចូលរួមចំណែកក្នុងការថែរក្សាបរិស្ថាន ជាពិសេស បរិស្ថានធម្មជាតិ គឺជាតួនាទីនិងការរក្សាអនាម័យនិងរក្សាព្រៃធម្មជាតិដែលមានក្នុងតំបន់ទេសចរណ៍ទាំងនោះ ។ ជាមួយនេះ នៅតាមខេត្តនានា មន្ទីរទេសចរណ៍មានតួនាទីជាអ្នកគ្រប់គ្រងនិងចាត់ចែងរៀបចំរមណីយដ្ឋានទាំងអស់ដែលមាននៅក្នុងខេត្តរបស់ខ្លួន ។

         និយាយរួម ប្រទេសយើងសម្បូរភោគទ្រព្យទេសចរណ៍ធម្មជាតិ ដែលសុទ្ធតែអាចយកមកបម្រើឱ្យការអភិវឌ្ឍវិស័យ ទេសចរណ៍ បង្កើតបានជាប្រភពចំណូលថវិកាជាតិមួយផ្នែកដ៏សំខាន់ ។

សង្កេតរូបភាព៖ ការអភិវឌ្ឍតំបន់ទេសចរណ៍