ជម្រាបសួរប្អូនៗសិស្សានុសិស្សទាំងអស់គ្នា សូមស្វាគមន៍មកកាន់ថ្នាក់រៀន ភាសាខ្មែរ សម្រាប់ថ្នាក់ទី ៨ | |
អ្នកគ្រូឈ្មោះ | |
លេខទំនាក់ទំនង | |
អ៊ីមែល | |
ភាពស្មោះត្រង់
គឺជាទៀងត្រង់អស់ពីចិត្តគ្មានកិច្ចកលមាយា។ ភាពស្មោះត្រង់បង្ហាញឱ្យឃើញតាមវាចា និងទង្វើ។
វាចាស្មោះត្រង់ គឺជាសម្តីពិតមិនភូតភរកុហសបោកប្រាស់។ ឯទង្វើស្មោះត្រង់
គឺសកម្មភាពមិនលួចលាក់ កេងបន្លំ ឆបោក បំភ័ន្តភ្នែកអ្នកដ៏ទៃ។ ទឹកចិត្តស្មោះ
គឺជាទឹកចិត្តស្រឡាញ់ដោយគ្មានកលល្បិច ឬពុតត្បុត មិនវៀចវេរ មិនច្រណែននិន្ទា ឈ្នានីស
មិនធ្វើបាបគ្នា មិនធ្វើឱ្យខូចផលប្រយោជន៍ផងគ្នា។ មនុស្សស្មោះត្រង់
គឺមនុស្សប្រកបដោយគុណធម៌ សីលធម៌រស់នៅថ្លៃថ្នូរដែលមនុស្សក្នុងសង្គមស្រឡាញ់រាប់អាននិងផ្តល់កិត្តិយសជូនជានិច្ច។
មិត្តភាព ជាដើមចមនៃសន្តិភាព និង ការអភិវឌ្ឍ។ មិត្តភាពចាប់ផ្តើមចេញពីសេចក្តីស្រឡាញ់ភាពស្មោះត្រង់ និង ការមានអធ្យាស្រ័យល្អ។ ការយោគយល់ អធ្យាស្រ័យ ស្មោះត្រង់ រាប់រកគ្នាសាមគ្គីភាពទូលំទូលាយ ធ្វើឱ្យយើងបង្កើនបាននូវមិត្តភាព និង ភាពសុខដុមរមនានៅក្នុងសង្គម។
ការស្គាល់ខ្លួនឯង ការជឿជាក់លើខ្លួនឯង និង ការធ្វើឱ្យខ្លួនឯងមានតម្លៃ គឺជាការគោរពខ្លួនឯង។ មុននឹងឱ្យអ្នកដទៃគោរពយើងឱ្យតម្លៃយើង លុះត្រាតែយើងចេះឱ្យតម្លៃខ្លួនយើង ហើយធ្វើខ្លួនឱ្យគេគោរពស្រឡាញ់។ អ្នកដទៃគោរពស្រឡាញ់យើង ល្គឹកណាខ្លួនយើងមានចំណេះដឹង មានឥរិយាបថថ្លៃថ្នូរសមជាពលរដ្ឋល្អ មានប្រយោជន៍សម្រាប់ខ្លួនឯង គ្រួសារ និង ប្រទេសជាតិ។
ច្បាប់ជាបញ្ញត្តិទាំងឡាយ ដែលគេតាក់តែងឡើងឱ្យមនុស្សប្រតិបត្តិតាម។ ច្បាប់ជាការកំណត់ជាបទបញ្ជា បទបញ្ញត្តិ ដែលមនុស្សទូទៅត្រូវប្រតិបត្តិតាម។ ការគោរពច្បាប់ផ្តើមចេញពីការចេះគោរពខ្លួនឯង ការចេះច្បាប់ប្រើសិទ្ធិរបស់ខ្លួន និងចេះគោរពសិទ្ធិអ្នកដទៃ។ គ្រប់ប្រទេសលើសកលសុទ្ធតែមានច្បាប់សម្រាប់ឱ្យប្រតិបត្តិតាម។ ប្រទេសដែលមានការគោរពច្បាប់ហៅថានីតិរដ្ឋ។
ការទទួលខុសត្រូវ ជាឥរិយាបថដ៏ប្រសើរថ្លៃថ្លាសម្រាប់បុគ្គលម្នាក់ៗ។ ការទទួលខុសត្រូវបង្ហាញឱ្យឃើញតាមរយៈការហ៊ានទទួលយកការពិត ការហ៊ានទទួលយករាល់អំពើរបស់ខ្លួនដែលបានប្រព្រឹត្តទាំងអំពើល្អនិងអំពើអាក្រក់។ ប៉ុន្តែការចេះកែប្រែកំហុសឆ្គង ការភ្ញាក់រលឹកមករកផ្លូវល្អ យកច្បាប់ជាធំ ជាទង្វើប្រកបដោយឧត្តមភាព។ ការទទួលខុសត្រូវក៏បង្ហាញឱ្យឃើញផងដែរ តាមរយៈការយកចិត្តទុកដាក់ ផ្ចិតផ្ចង់ មានប្រសិទ្ធផាពលើរាល់សកម្មភាពរបស់បុគ្គលដែលញ៉ាំងឱ្យមានការជឿជាក់មានទំនុកចិត្តពីអ្នកដទៃនិងសង្គមជាតិ។
ការជឿជាក់កើតឡើងពីភាពប្រាកដប្រជាក្នុងចិត្ត ការជឿជាក់ចំពោះខ្លួនឯង និងការទុកចិត្តលើអ្នកដទៃ។ ការមានជំនឿក្នុងចិត្ត និងមានទំនុងចិត្តនឹងជំរុញមានសេចក្តីក្លាហាន អំណត់ព្យាយាមដែលជាកក្តានាំឆ្ពោះទៅរកភាពខ្ពង់ខ្ពស់ ប្រសើរថ្លៃថ្លា និងជ័យជំនះ។
សេចក្តីថ្លៃថ្នូរ គឺជាភាពចាំបាច់របស់មនុស្ស ដែលបានស្តែងចេញតាមរយៈអំពើរបស់ខ្លួន។ អំពើល្អទាំងនោះត្រូវបានផ្សារភ្ជាប់ជាមួយនឹងសកម្មភាពវិជ្ជមាន ដោយការប្រកាន់មុខរបរសុចរិត ការគោរពសិទ្ធិ ឬក៏ការគោរពច្បាប់ជាដើម។ មិនតែប៉ុណ្ណោះសេចក្តីថ្លៃថ្នូរក៏បានកំណត់តម្លៃបុគ្គល ឬតម្លៃជាតិឱ្យមានភាពវិសេលវិសាលថែមទៀត នៅចំពោះមុខសង្គមមនុស្ស ឬពិភពលោកទាំងមូល។
មនុស្សគ្រប់ៗ គ្នាតែងប្រាថ្នាចង់បានភាពខ្ពង់ខ្ពស់ ប្រសើរថ្លៃថ្លា និងកិត្តិយសខ្ពស់មុខមាត់នៅក្នុងសង្គម។ កិត្តិយស និងភាពខ្ពង់ខ្ពស់ប្រសើរថ្លៃថ្លាអាចកើតមានបាន ឬមិនបានអាស្រ័យលើឧត្តមគតិសកម្មភាព និងការសេពគប់របស់បុគ្គលម្នាក់ៗ។ ការតស៊ូ អំណត់ព្យាយាមប្រព្រឹត្តតែអំពើល្អត្រឹមត្រូវតាមច្បាប់ និងវៀរចាកអំពើអន្ធពាលនាំឱ្យយើងទទួលបាននូវឧត្តមភាព។